"ბათუმელმა მედროშემ", თემურ ქათამაძემ თურქეთიდან საქართველოში წერილი გამოაგზავნა. ამის შესახებ ინფორმაციას ბათუმელები ავრცელებს.

"ჩემო თანამებრძოლო დებო და ძმებო!

ლაჩრულად, ვერაგულად მე კი გამიტაცეს — გამაგდეს ჩემი სათაყვანებელი საქართველოდან, მაგრამ ყველამ იცოდეს, მე ფარ-ხმალი არ დამიყრია! ჯერ ადრეა დანებება! ივანიშვილის რუსული რეჟიმის წინააღმდეგ ისევ თქვენ გვერდით ვარ უფრო გაძლიერებული, უფრო გაბრაზებული და რაც მთავარია, სრულიად თავისუფალი!

ჩემი ბრძოლა სამშობლოსთვის აქედანაც გაგრძელდება ბოლომდე, გამარჯვებამდე! თუმცა ჩემი დღევანდელი რეალობიდან გამომდინარე, სხვა და უფრო ეფექტიანი ფორმებით მანამ, სანამ ყველა ერთად დედასამშობლოში გამარჯვებას არ ვიზეიმებთ.

11 ივნისს 03:07 საათზე საქართველო-თურქეთის საზღვარზე ხმამაღლა რაც დავპირდი მიგრაციის დეპარტამენტის დირექტორის მოადგილეს, თემურ ცერცვაძეს, ჩემი უკანონო ექსტრადირების დამსწრეს 100-მდე (ქართველი-თურქი) მილიციელის წინაშე ჩემი მარჯვენა მუშტის მაღლა აწევით, მალე შევასრულებ იმ პირობას, როგორც "ჯინიანი ქართველი".

ივანიშვილის რუსულ რეჟიმს: მალე გაჩვენებ სეირს!

მხოლოდ ერთი პირადი სათხოვარი მაქვს თქვენთან, ჩემი სული და გული, ჩემი ნინო (მეგობარი ქალი) მარტო დამრჩა იქ და უსინდისოებს მიზანში ჰყავთ აყვანილი. ნინო არ დამიტოვოთ უყურადღებოდ. ჩემ დაბრუნებამდე მას ეპატრონეთ, გთხოვთ.

რაც შეეხება ჩემს მთავარ სათხოვარს თქვენთან, ის ისევ უცვლელი რჩება: "არასოდეს, არასოდეს არ დანებდეთ!" (საქართველოს ეროვნული გმირი გიორგი ანწუხელიძე"

თქვენი ბათუმელი მედროშე თემურ ქათამაძე.

20 ივნისი, სტამბოლი".

ცნობისთვის, ბათუმელი მედროშის სახელით ცნობილი თემურ ქათამაძე, რომელიც მუჰაჯირების შთამომავალი და პროევროპული აქციების მონაწილეა 10 ივნისს გვიან ღამით თურქეთში გააძევეს. ის ათ წელზე მეტი ხნის განმავლობაში იბრძოდა საქართველოს მოქალაქეობის მისაღებად.