თბილისის საკრებულოს ოპოზიციური პარტიების დეპუტატები აცხადებენ, რომ ზვიად ნაზღაიძემ, ზარალის ასანაზღაურებლად, მილიონი ლარი იმ მიწის ნაკვეთისთვის მიიღო, რომელიც თბილისში მომხდარი სტიქიის შემდეგ გამოისყიდა. ზვიად ნაზღაიძე რუსთავი 2-ის საქმის განმხილველი მოსამართლის, ნატა ნაზღაიძის ძმაა. ტელეკომპანია რუსთავი 2-მა 5 თებერვალს გადაცემა პოსკრიპტუმში რეპორტაჟი გაუშვა, რომელშიც საუბარი იყო იმაზე, რომ ზვიად ნაზღაიძემ ბიუჯეტიდან 1 მილიონი ლარი მიიღო.

თბილისის მუნიციპალიტეტის საკრებულოს ფრაქციების - მოძრაობა თავისუფლებისთვის, ერთიანი ნაციონალური მოძრაობა, რესპუბლიკელები, ეროვნული ფორუმის წარმომადგენლებმა და დამოუკიდებელმა დეპუტატებმა პრესკონფერენცია გამართეს. როგორც მათ განაცხადეს, ფრაქციებმა და დამოუკიდებელმა დეპუტატებმა საჯარო რეესტრიდან საქმესთან დაკავშირებული დოკუმენტები და ხელშეკრულებები შეისწავლეს.

"წარმოდგენილი დოკუმენტებით ნათლად ჩანს, რომ 2013 წლიდან 2016 წლამდე აღნიშნული მიწის ნაკვეთის მესაკუთრე გახლდათ საქართველოს ბანკი,"- განაცხადეს დეპუტატებმა.

მათივე თქმით, სამხარაულის ეროვნული ბიუროს შეფასებით, ამ მიწის ნაკვეთის ღირებულება 971 ათასი ლარი იყო, სტიქიის შემდეგ, 2016 წლის დეკემბრისთვის კი - 23 ათასი ლარი. დეპუტატების ინფორმაციით, მოსამართლის ძმამ მიწის ნაკვეთის მესაკუთრე 2016 წლის 29 ნოემბერს გახდა.

საკრებულოს ოპოზიციური ფრაქციების წარმომადგენლები, დამოუკიდებელ დეპუტატებთან ერთად, საკრებულოს თავმჯდომარეს საკითხის სხდომაზე განხილვის მოთხოვნით მიმართავენ და იმ განკარგულების გაუქმებას მოითხოვენ, რომლის საფუძველზეც ნაზღაიძეს თანხა გადაერიცხა.