ქართული ოცნების დეპუტატი, ირაკლი ზარქუა ამტკიცებს, რომ ნაციონალური მოძრაობის თავმჯდომარის, ნიკა მელიას დაკავების "ღონისძიება ევროპული სტანდარტებით ჩატარდა". ამის შესახებ მან TV პირველის ჟურნალისტს პარლამენტში განუცხადა.

"ევროპული სტანდარტით ჩატარდა ეს საპოლიციო ღონისძიება, არა მგონია, ვინმე იყოს ბედნიერი. აქ უბრალოდ, როცა კანონი ირღვევა, შესაბამისად უნდა აღსრულდეს. ჩვენ, როცა ვიცავთ კანონს ამით ვუახლოვდებით ევროპას, ევროსტანდარტებს, ცივილიზებულ სამყაროს. როდესაც კანონს არღვევ და მუქარის ენით ელაპარაკები სახელმწიფო ინსტიტუციებს და გაქვს მცდელობა ჩამოშალო, ეს არის ცუდი", — ამბობს ის.

მისივე თქმით, გავრცელდა "არასწორი" ინფორმაცია, რომ მხუთავი გაზი გაუშვა პოლიციამ. ზარქუა ამბობს, რომ ეს იყო სპრეი.

დღეს სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ. რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმებელი შენონაში შევიდნენ როგორც სახურავიდან, ისე პირველ სართულზე არსებული შესასვლელებიდან. მათ პირველი საართული გაათავისუფლეს და მოგვიანებით ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იყო გამაგრებული. მათ ოთახში გამოიყენეს გაზიც.

აღსანიშნავია, რომ მელიას დაპატიმრება სწორედ ყოფილი პრემიემინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.