სამართლიანი არჩევნებისა და დემოკრატიის საერთაშორისო საზოგადოების (ISFED) ახალი დირექტორი ნინო დოლიძეა. იგი ორგანიზაციის გამგეობამ აირჩია და მუშაობას დღეიდან შეუდგება.

ორგანიზაციის მიერ გავრცელებულ განცხადებაში ვკითხულობთ, რომ დოლიძეს აქამდეც, 2007-2011 წლებშიც უმუშავია ISFED-ში. ამავე განცხადებიდან ვიგებთ, რომ ბოლო 8 წლის განმავლობაში დოლიძე საერთაშორისო რესპუბლიკურ ინსტიტუტში (IPI) საგანმანათლებლო პროგრამის ხელმძღვანელი იყო. ასევე, მუშაობდა მრავალპარტიული დემოკრატიის განვითარებისა და ქალთა პოლიტიკური გაძლიერების მიმართულებით.

აქამდე ISFED-ს ელენე ნიჟარაძე ხელმძღვანელობდა, რომლის გადადგომის შესახებ ინფორმაცია გასული წლის 24 დეკემბერს გავრცელდა. 25 დეკემბერს, ორგანიზაციის გამგეობის ერთ-ერთმა წევრმა, ბაია პატარაიამ ინფორმაცია დაადასტურა და ამის მიზეზად 31 ოქტომბრის არჩევნების ხმების პარალელური დათვლის შედეგების (PVT) ცდომილებაზე საზოგადოებასთან დაგვიანებული კომუნიკაცია დაასახელა.

ISFED-ის ხმების პარალელური დათვლა

2020 წლის 11 დეკემბერს ISFED-მა გაავრცელა ინფორმაცია, რომ საპარლამენტო არჩევნების შემდეგ ხმების პარალელური დათვლის (PVT) პირველადი, შიდა აუდიტის მიხედვით, გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში.

თავდაპირველად, 31 ოქტომბრის არჩევნების პარალელური დათვლის (PVT) შედეგების მიხედვით, ქართულმა ოცნებამ 45,8% აიღო, ხოლო ნაციონალურმა მოძრაობამ 26,4%. 11 დეკემბერს ISFED-ის მიერ გასწორებული მონაცემების მიხედვით კი, ქართულმა ოცნებამ 47,6%, ხოლო ნაციონალურმა მოძრაობამ 27,4% აიღო, რაც ცდომილების ზღვარის გათვალისწინებით, ცესკოს მონაცემებთან უფრო ახლოსაა. ცესკოს დათვლით, ქართულმა ოცნებამ ხმების 48,22%, ნაციონალურმა მოძრაობამ კი — 27,17% მიიღო.

მიმდინარე წლის 29 იანვარს, ISFED-ის წარმომადგენლებმა განაცხადეს, რომ ხელახლა გადაითვალეს საპარლამენტო არჩევნების 850 PVT უბანი და აღმოჩნდა, რომ შემაჯამებელი ოქმებში მეტობით დისბალანსი 8%-ს შეადგენდა. მათი განცხადებით, ოქმებში დისბალანსი საარჩევნო ადმინისტრაციამ უმეტესწილად კენჭისყრის დღის შემდეგ გაასწორა.

გაიგეთ მეტი: