ლაგოდეხში 30 წლის კაცი 10 წლის ბავშვის გაუპატიურების ბრალდებით დააკავეს. შინაგან საქმეთა სამინისტროს ინფორმაციით, ბავშვი ოჯახში სტუმრად იყო, როცა კაცმა სქესობრივი დანაშაული ჩაიდინა. გამოძიება დაწყებულია სისხლის სამართლის კოდექსის 137-ე მუხლის მე-4 ნაწილის "დ" ქვეპუნქტით, რაც გულისხმობს არასრულწლოვნის გაუპატიურებას ნდობის, ავტორიტეტული ან გავლენიანი მდგომარეობის გამოყენებით.

გარდა ამისა, ამავე კაცს ოჯახში ძალადობა ედება ბრალად. შსს-ს ცნობით, ის არასრულწლოვანი შვილების თანდასწრებით, ცოლს სისტემატურად ემუქრებოდა სიცოცხლის მოსპობით და ძალადობდა ბავშვებზეც.

"ბრალდებული, არასრულწლოვანი შვილების თანდასწრებით, მეუღლის მიმართ სისტემატურად ახორციელებდა ფსიქოლოგიურ ძალადობას და დანის დემონსტრირებით სიცოცხლის მოსპობით დაემუქრა მას. გ.ი. არასრულწლოვან შვილებზეც ძალადობდა. გამოძიებით, ასევე, დადგინდა, რომ ბრალდებულმა თავის ოჯახში სტუმრად მყოფი 10 წლის მცირეწლოვანი გოგონას მიმართ სქესობრივი დანაშაული ჩაიდინა", — აცხადებენ შსს-ში.

გამოძიება საქართველოს სისხლის სამართლის კოდექსის 11'-151-ე მუხლის მე-2 ნაწილის "დ" ქვეპუნქტით, 126'-ე მუხლის მე-2 ნაწილის "ა," "ბ" და "გ" ქვეპუნქტებით და 137-ე მუხლის მე-4 ნაწილის "დ" ქვეპუნქტით მიმდინარეობს. დანაშაული 15-დან 20 წლამდე ან უვადოდ თავისუფლების აღკვეთას ითვალისწინებს.