ქართული ოცნების დეპუტატის, ნინო წილოსანის აზრით, შაბათ-კვირას დაწესებული შეზღუდვების შემსუბუქება შესაძლებელია, რადგან არ წარმოადგენს განსაკუთრებულ რისკებს. ასევე, დეპუტატი ფიქრობს, რომ ზამთრის კურორტები უნდა გაიხსნას, თავდაპირველად მხოლოდ სასტუმროები მაინც.

"ყოველთვის როგორც საჯარო, ისე დახურულ შეხვედრებზე ვახმოვანებ აუცილებლობას რეგულაციების შემსუბუქებასთან დაკავშირებით. მათ შორის, აქტიურად ვითხოვდი ტრანსპორტის და სკოლების უფრო ადრე გახსნას ვიდრე ეს რეალურად მოხდა. ახლაც, მიმაჩნია, რომ შაბათ-კვირას დაწესებული შეზღუდვები შეიძლება შემსუბუქდეს, რადგან არ წარმოადგენს განსაკუთრებულ რისკებს. ასევე, ეკონომიკის მინისტრს ვთხოვე ზამთრის კურორტების გახსნა, თუნდაც თავდაპირველად სასტუმროების ნაწილში", — წერს ის ფეისბუქზე.

მანამდე კომიტეტების გაერთიანებულ სხდომაზე მან ეკონომიკის მინისტრის მოვალეობის შემსრულებელს, ნათია თურნავას ჰკითხა, რა ხედვა ჰქონდა შეზღუდვების შემსუბუქებაზე და ივარაუდა, რომ საკითხზე ერთნაირი მიდგომა აქვთ.

"ეკონომიკისა და მდგრადი განვითარების სამინისტრო და თავად მინისტრიც ბიზნესის მხარდაჭერის მიმართულებით მუშაობს. აქედან გამომდინარე, ვფიქრობ, რომ მე და ნათია თურნავას რეგულაციების შემსუბუქების საკითხზე ერთნაირი მიდგომა გვექნება. იმედი მაქვს, რომ ახალი პრემიერ-მინისტრის პირობებში ჩვენ გარკვეულ დაჩქარებულ გეგმებს შევთავაზებთ ბიზნესს, იმ ადამიანებს, რომელთა ცხოვრების პირობებზე და საქმიანობაზე ამ რეგულაციებს პირდაპირი გავლენა აქვს. საინტერესოა თქვენი ხედვა ამ საკითხთან დაკავშირებით, თუნდაც შაბათ-კვირის შეზღუდვების მიმართ. კაფეები და რესტორნებისთვის, რომლებიც ღია სივრცეს ამუშავებენ, მაშინ როდესაც კვირის ორი მნიშვნელოვანი დღე აკლდებათ", — თქვა ნინო წილოსანმა.

საკოორდინაციო საბჭოს გადაწყვეტილებით ზამთრის კურორტები ისევ დახურულია. გარდა ამისა, შაბათ-კვირას ქვეყნის მასშტაბით არ ფუნქციონირებს სავაჭრო ცენტრები და ბაზრობები, არ მოძრაობს საზოგადოებრივი ტრანსპორტიც.