NATO-ს საპარლამენტო ასამბლეის პრეზიდენტი, ჯერალდ კონოლი საქართველოში ბოლო დღეებში განვითარებულ პოლიტიკურ მოვლენებზე ხელისუფლებასა და ოპოზიციას მაქსიმალური თავშეკავებისკენ მოუწოდებს. მისი თქმით, მიმდინარე პროცესებს ის შეშფოთებით აკვირდება.

"ღრმად მწამს, რომ ჯანსაღი დემოკრატია საქართველოს პოტენციალის სრულად გამოვლენის ერთადერთი გზაა. სამწუხაროდ, ბოლო დროინდელი პოლიტიკური ტენდენციები, მათ შორის პოლიტიკური პოლარიზაციის გაღრმავება, საქართველოს ყველა მოქალაქის ინტერესებში არსებული სამართლიანი დემოკრატიის ფუნქციონირებასთან წინააღმდეგობაში მოდის", — აცხადებს კონოლი.

ის, ასევე, ამბობს, რომ სულ რაღაც 10 დღის წინ, კონგრესში საქართველოს მხარდაჭერის აქტი დაარეგისტრირა, რომელიც შტატების მხრიდან საქართველოს სუვერენიტეტისა და უსაფრთხოების მტკიცე მხარდაჭერას უსვამს ხაზს, განსაკუთრებით რუსეთის აგრესიის პირობებში.

"გაჭიანურებული პოლიტიკური ჩიხიდან გამოსვლას საქართველოს დემოკრატიული მომავლისა და ევროატლანტიკური ინტეგრაციისთვის გადამწყვეტი მნიშვნელობა აქვს. ამის მიღწევა კი, მხოლოდ დიალოგისა და უმრავლესობასა და ოპოზიციას შორის ნდობის აუცილებელი პირობების შექმნით არის შესაძლებელი", — აღნიშნავს საქართველოს მეგობართა ჯგუფის თანათავმჯდომარე აშშ-ის წარმომადგენელთა პალატაში.

როგორც მის განცხადებაში წერია, NATO-ს საპარლამენტო ასამბლეა მზადაა ამ საქმეში საქართველოს მხარდაჭერა გააგრძელოს.

"საერთო დემოკრატიული ღირებულებები ნატოს წევრ ქვეყნებსა და საქართველოს მსგავს პარტნიორებს შორის ჩვენი უძლიერესი იარაღია მოსკოვის, პეკინისა და სხვა ქვეყნების ავტოკრატიების წინააღმდეგ", — ვკითხულობთ განცხადებაში.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.

მთელი ღამის განმავლობაში ნაციონალური მოძრაობის ოფისში ოპოზიციური პარტიების ლიდერები იმყოფებოდნენ. ისინი აცხადებენ, რომ ხელისუფლებას მელიას დაკავების საშუალებას არ მისცემენ. 18 თებერვალს, დილით პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.

გუშინ, 18 თებერვალს ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი მეორედ გახდება.