საქართველოში ამერიკის საელჩოს ნაციონალური მოძრაობის ოფისში განვითარებულ მოვლენებთან დაკავშირებით აცხადებს, რომ აუცილებელია, ხელისუფლებამ და ოპოზიციამ მაქსიმალური თავშეკავება გამოიჩინოს ამ დილით. ისინი მხარეებს სიმშვიდის შენარჩუნებისა და ძალადობის თავიდან აცილებისკენ მოუწოდებენ.

"არსებული სახიფათო ვითარება, რომელიც ნიკა მელიას სასამართლო გადაწყვეტილებას მოჰყვა გამომდინარეობს საარჩევნო და სასამართლო სისტემის მრავალწლიანი პრობლემებიდან. აუცილებელია, რომ ხელისუფლებამ და ოპოზიციამ გამოიჩინოს მაქსიმალური თავშეკავება ამ დილით. არსებული უმნიშვნელოვანესი საკითხების გადაჭრის გზა მხოლოდ მშვიდობიანი მოლაპარაკებებია. მოვუწოდებთ ყველას, შეინარჩუნონ სიმშვიდე და თავიდან აიცილონ ძალადობა", — წერია საელჩოს მიერ გავრცელებულ განცხადებაში.

დაახლოებით, ერთი საათის წინ, ერთიანი ნაციონალური მოძრაობის ოფისში პოლიცია მივიდა. სამართალდამცავები მობილიზებულები არიან მიმდებარე ტერიტორიაზეც. მათი განცხადებით, სასამართლოს მიერ გაცემულია განჩინება და ადგილზე სწორედ იმიტომ არიან, რომ "შესაბამისი ზომები გაატარონ".

ისინი პარტიის ოფისში შესვლას ცდილობდნენ, თუმცა აქტივისტებმა ამის საშუალება არ მისცეს.

ენმ-ს ოფისში კი, ნიკა მელია ოპოზიციური პარტიების ლიდერებთან და მხარდამჭერებთან ერთად იმყოფება. ოპოზიციის ლიდერები ამბობენ, რომ ფარად დაუდგებიან მელიას და მისი დაკავების უფლებას არ მისცემენ, რადგან უკანონო გადაწყვეტილებას არ ემორჩილებიან. ისინი ნაციონალური მოძრაობის ოფისში ნიკა მელიასთან ერთად არიან შეკრებილები და მორიგეობას გეგმავენ.

თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.