ნაციონალური მოძრაობის წევრის, რომან გოცირიძის განცხადებით, 1 საათში, როცა ნიკა მელიას სასამართლო სხდომა დასრულდება, გაირკვევა ჩაწვავს თუ რა ქართული ოცნება ხიდებს ქართულ საზოგადოებასთან. მისივე თქმით, გაირკვევა ისიც, ქართული ოცნება აპირებს შედარებით მშვიდი ნაბიჯით სხვლას "პოლიტიკური სამარისკენ, თუ ძალიან სწრაფად დაენარცხება პოლიტიკურ სამარეში".

"დღეს მოსამართლემ უნდა მიიღოს პოლიტიკური გადაწყვეტილება, ის გადაწყვეტილება რასაც დაავალებს პოლიტიკური ხელმძღვანელობა.

გაზვიადებული იქნება იმაზე საუბარი, რომ გადაწყვეტილებას იღებს ქართული ოცნება. გადაწყვეტილება ისეთი, რასაც უკარნახებს ბიძინა ივანიშვილი.

ამ მასშტაბის პოლიტიკური ფიგურის, ამ მასშტაბის პოლიტიკური პარტიის ლიდერის დაპატიმრების ერთადერთი გადაწყვეტილების მიმღები არის ბიძინა ივანიშვილი. პერსონალური პასუხისმგებლობა დაეკისრება მას", — განაცხადა მან.

გოცირიძემ აღნიშნა ისიც, რომ მელიას ოპოზიიცა აუცილებლად დაიცავს და მისი დაპატიმრების უფლებას არ მისცემენ.

"რაც შეეხება დაცვას, ერთ-ერთმა პირველმა ვთქვი და სიმბოლური ნათქვამია ის, რომ ეს შენობა მყარად არის აშენებული და გაუძლებს 9-ბალიან მიწისძვრას. გაუძლებს ყველანაირ მიწისძვრას ოპოზიცია. გაუძლებს ყველანაირ უსამართლობასა და შეტევას", — განაცხადა მან.

თბილისის საქალაქო სასამართლოში ნიკა მელიას აღკვეთის ღონისძიების გამკაცრებაზე მსჯელობა დაიწყო. პროკურატურა პატიმრობას ითხოვს, ადვოკატები კი მიიჩნევენ, რომ არათუ პატიმრობის, არამედ აღკვეთის ღონისძიების საფუძველი საერთოდ არ არსებობს. მელია პროცესს არ ესწრება.

ქართულმა ოცნებამ ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

როგორც უკვე აღვნიშნეთ, ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.