ნაციონალური მოძრაობის ერთ-ერთი წევრის, გიორგი ბარამიძის განცხადებით, თუ პროკურატურა "ძალის გამოყენებით" დააპირებს პარტიის თავმჯდომარის, ნიკა მელიას დაკავებას, ისინი ამის საშუალებას არ მისცემენ. მისი თქმით, სპეცრაზმს, თუ ნებისმიერ სხვას, ოფისის "შტურმით" აღება მოუწევს. ასე ეხმაურება იგი მელიასთვის იმუნიტეტის შეჩერების შესახებ გადაწყვეტილებას.

"ნიკა მელიას ვერ დააკავებენ, კიდევ ერთხელ ვიმეორებ, ჩვენ მოველოდით ამ გადაწყვეტილებას, არა მარტო ნაციონალური მოძრაობის წევრები და მხარდამჭერები, არამედ სხვა პარტიის წევრები და რიგითი ადამიანები, რომელთაც განცდა გაუჩნდათ პროტესტისა გავრილოვის აქ ჩამოთრევასთან დაკავშირებით. ყველა დღესაც ხედავს, რომ ნიკა მელიას კი არ იჭერენ მარტო, პოტენციურად ყველა მათგანს, ვინცა აღშფოთდა გავრილოვის აქ ჩამოსვლის გამო.

აქედან გამომდინარე, ყველა, ვინც დააპირებს მოვიდეს აქ ნაციონალური მოძრაობის ოფისში, ცოცხალ-მკვდრად დავუდგეთ ნიკა მელიას წინ. თუ ისინი დააპირებენ, რომ ძალის გამოყენებით დააკავონ ნიკა მელია, დავუდგეთ წინ, რომ მათ ამის საშუალება არ მივცეთ. ამას გავაკეთებთ არა ძალადობრივი ფორმით, მშვიდობიანად. ოღონდ აქ იმდენი ხალხი იქნება და იმხელა წინააღმდეგობა იქნება მშვიდობიანი, მათ მოუწევთ, სპეცრაზმი იქნება, თუ რაც იქნება, ენმ-ს ოფისის შტურმი. რას გააკეთებენ, როგორ გააკეთებენ და ვის დაიჭერენ, ამას დავინახავთ", — განაცხადა მან.

ქართულმა ოცნებამ პლენარულ სხდომაზე ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება. გამოძიება სისხლის სამართლის კოდექსის 225-ე მუხლის პირველი და მეორე ნაწილით მიმდინარეობს. ამ მუხლით 4-დან 9 წლამდე სისხლისსამართლებრივი პასუხისმგებლობა ძალადობრივი ჯგუფის ხელმძღვანელობისა და მასში მონაწილეობისთვის დგება.

პროკურატურა მელიასთვის პატიმრობას ითხოვდა, თუმცა 2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.