ევროპული საქართველოს ერთ-ერთი ლიდერი, გიგა ბოკერია ეხმაურება დავით ბაქრაძისა და გიგი უგულავას გადაწყვეტილებას, ჩამოშორდნენ პარტიის მართვის სადავეებს და ამბობს, რომ მათ ადგილას ასეთ ემოციურ და არასერიოზულ შედარებებს არ გააკეთებდა.

"გიგიმ [უგულავა] და დათომ [ბაქრაძე] მიიღეს თავისი გადაწყვეტილება, რომელსაც მე პატივს ვცემ. მე ვცადე მათი გადარწმუნება, მათ სცადეს ჩემი გადარწმუნება, ვერ შევთანხმდით. არ დავმალავ, მე ასეთ ემოციურ და ჩემი აზრით, არასერიოზულ შედარებებს არ გავაკეთებდი — სარკისებურად, პირიქით მდგომარეობაში რომ ვყოფილიყავი — ამდენი ნეგატიური შეფასება ... მაგრამ, ესეც მათი უფლებაა.

ჩვენ გვაქვს ბევრად უფრო დიდი ამოცანები. არა მარტო ჩვენ პოლიტიკურ გუნდს, მთელ საზოგადოებას და ამ პროცესში პოლიტიკურ პარტიებთან ერთად დათო და გიგიც მონაწილეობას მიიღებენ, როგორც, ამ მომენტისთვის, უპარტიო, მაგრამ, მნიშვნელოვანი ფიგურები", — განაცხადა გიგა ბოკერიამ.

12 თებერვალს ევროპული საქართველოს ლიდერებმა, დავით ბაქრაძემ და გიგი უგულავამ განაცხადეს, რომ პარტიის მომდევნო ყრილობაზე აღარ დააყენებდნენ თავიანთ კანდიდატურას პარტიულ თანამდებობებზე ასარჩევად.

ბაქრაძემ განაცხადა, რომ არასწორად მიაჩნია ლიდერთა ნაწილის წასვლა და ნაწილის დარჩენა, რადგან, მისი აზრით ეს პარტიის განახლების იდეას ეწინააღმდეგება. იგივეს ფიქრობს უგულავაც. მას იმედი აქვს, რომ ბოკერია აზრს შეიცვლის, წინააღმდეგ შემთხვევში კი, უგულავას აზრით, პარტია ჩიხში შევა.

"ყველა თანასწორია და ვიღაცა უფრო თანასწორი" ვერ იქნება", — განაცხადა გიგი უგულავამ.

გიგა ბოკერიამ განაცხადა, რომ პატივს სცემს კოლეგების გადაწყვეტილებას, თუმცა, მას განსხვავებული პოზიცია აქვს.

გაიგეთ მეტი: