ნაციონალური მოძრაობის ერთ-ერთი წევრის, გიორგი ბარამიძის განცხადებით, დაუმორჩილებლობის აქციაში მონაწილეობის გამო, ის და მისი ცოლი 2-2 ათასი ლარით დააჯარიმეს. ამის შესახებ მან საკუთარ ფეისბუქზე დაწერა და თქვა, რომ მას პოლიცია ტელეფონზე დაუკავშირდა.

"ავუხსენი, რომ ეს მოქმედება იყო ჩვენი პოლიტიკური პროტესტი, პოლიტიკური მოტივებით მოქმედი ჩვენი ქვეყნის ეკონომიკის დამანგრეველი და ხალხის კიდევ უფრო მეტად გამაღარიბებელი შეზღუდვების წინააღმდეგ. ამიტომ, ცხადია, არ ვეთანხმები ამ ჯარიმის სამართლიანობას და ვაპირებთ, შესაბამისი წესით, სასამართლოში გავასაჩივროთ", — განაცხადა მან.

შინაგან საქმეთა სამინისტრომ 6-7 თებერვალს, დაუმორჩილებლობის აქციაზე მყოფი პირების დაჯარიმება დაიწყო. მიუხედავად იმისა, რომ აქციის მიმდინარეობისას ადგილზე მობილიზებული იყო ასეულობით პოლიციელი, პროტესტში მონაწილე მხოლოდ რამდენიმე პირი დააჯარიმეს, სხვებს კი მომდევნო დღეებში ტელეფონით აცნობეს. შინაგან საქმეთა სამინისტროს განცხადებით, დაუმორჩილებლობის აქციაზე იდენტიფიცირებულია 51 პირი. მათვეი თქმით, აქედან 8 ადამიანი 2 000 ლარით დააჯარიმეს გადაადგილების შეზღუდვის დარღვევის გამო, 24 პირზე კი დაწყებულია ადმინისტრაციული სამართალწარმოება. აქტივისტები აცხადებენ, რომ ჯარიმის გადახდას არ აპირებენ.

სამოქალაქო აქტივისტებმა და ბიზნესის სხვადასხვა სფეროს წარმომადგენლებმა თბილისში ე.წ. დაუმორჩილებლობის აქცია 7 თებერვალს გამართეს. აქცია მიმდინარეობდა ბათუმშიც. მოქალაქეები კორონავირუსის გავრცელების პრევენციის მიზნით დაწესებულ შეზღუდვებს აპროტესტებდნენ და მოითხოვდნენ, როგორც კომენდანტის საათის მოხსნას, ასევე, ბიზნესის სხვადასხვა სფეროს სრულად აღდგენას.