ევროპული საქართველოს ლიდერი, დავით ბაქრაძე აცხადებს, რომ პარტიაში მიმდინარე ცვლილებებზე უახლოეს სამ დღეში გახდება ცნობილი. ინფორმაცია დაგეგმილი ცვლილებების შესახებ თავდაპირველად On.ge-მ გაავრცელა.

დღეს გავრცელებულ განცხადებაში დავით ბაქრაძე აღნიშნავს, რომ ჯერ-ჯერობით პარტიაში მიდის მსჯელობა სამომავლო გეგმებთან დაკავშირებით, თუ რა ტიპის სტრუქტურული ცვლილებები უნდა მოხდეს პარტიაში და რა უნდა იყოს სამომავლო გეგმები, ხოლო ამის შესახებ საზოგადოება უახლოეს დღეებში გაიგებს ყველაფერს.

"დღეს ვერ დაგიდასტურებთ ვერანაირ გადაწყვეტილებას პერსონალური ან საკადრო გადაწყვეტილებების შესახებ. უახლოეს დღეებში, კვირის ბოლომდე, საზოგადოებას ეცოდინება ყველა დეტალი, მათ შორის პირად გადაწყვეტილებებთან დაკავშირებითაც, მაგრამ რაც დღეს შემიძლია ხაზგასმით ვთქვა, არის ის, რომ როგორიც არ უნდა იყოს შიდა პარტიული გადალაგება, ის გავლენას არ მოახდენს საერთო პოზიციონირებაზე ოპოზიციის საერთო ამოცანებთან დაკავშირებით, კერძოდ, მხედველობაში მაქვს ოპოზიციის მიმდინარე ბრძოლა, პარლამენტის ბოიკოტი და პარლამენტში არშესვლის ნიშნად დაწერილი განცხადებები", — აცხადებს ბაქრაძე.

ევროპულ საქართველოში სტრუქტურული ცვლილებები იგეგმება. ამის შესახებ On.ge-ს პარტიის ლიდერებმა განუცხადეს. დავით ბაქრაძეს მას შემდეგ დავუკავშირდით, რაც მივიღეთ ინფორმაცია, რომ ის ევროპული საქართველოდან წასვლას აპირებს. პარტიის არცერთი ლიდერი ამას არ ადასტურებს, თუმცა საუბრობენ სტრუქტურულ ცვლილებებზე.