თბილისის მერი, კახა კალაძე სპორტის სასახლესთან განაშენიანებას "ურბანულ გენოციდს" უწოდებს. როგორც მან მთავრობის სხდომაზე აღნიშნა, ეს მაგალითია იმისა, როგორ არ უნდა განვითარდებ ქალაქი.

"ყველა ვთანხმდებით იმაზე, რომ არავის არ მოგვწონს განაშენიანება, რაც სპორტის სასახლის მიმდებარე ტერიტორიაზეა. მე შთაბეჭდილება მრჩება, რომ ნებართვის გამცემი და ნებართვის მიმღები ერთმანეთს ეჯიბრებოდნენ ვინ უფრო მეტ და მაღალ კორპუსს ჩადგამდა ამ კონკრეტულ ტერიტორიაზე. არანაირად არ არის განსაზღვრული ურბანულად გზები როგორ უნდა იყოს დაგეგმარებული, რეკრეაციულ სივრცეებზე ზედმეტია საუბარი. ელემენტარულად რომ შეხვიდე, შეიძლება ვეღარ გამოხვიდე, თუ იქ არ ცხოვრობ და ქუჩები არ იცის", — განაცხადა კალაძემ.

მისივე თქმით, ერთ-ერთმა კომპანიამ ტყვარჩელის ქუჩაზე ბარაკების ნაცვლად კორპუსების აშენება ითხოვა. თუმცა როგორც მერი ამბობს, ტერიტორიაზე ადგილმონაცვლეობის პრინციპით სკვერს მოაწყობენ.