პარტია ლელოს ლიდერი, მამუკა ხაზარაძე მიიჩნევს, რომ სახელმწიფო ვაქცინაციის პარალელურად, მოსახლეობისთვის ამ სერვისის მიწოდება კერძო სექტორსაც უნდა შეეძლოს.

"სახელმწიფო ვაქცინაციის პარალელურად, აუცილებლად ნებადართული უნდა იყოს ვაქცინის კომერციულად შემოტანა წინასწარ დათქმული პირობების შესაბამისად, ეს მოსახლეობის ვაქცინაციის ტემპს მნიშვნელოვნად დააჩქარებდა", — აცხადებს ხაზარაძე.

მისივე თქმით, ვაქცინის შემოტანა უნდა ყოფილიყო უმთავრესი პრიორიტეტი და მოსახლეობის აცრა უკვე უნდა დაწყებულიყო.

"ამით უფრო სწრაფად ავამუშავებდით ეკონომიკას, შევაჩერებდით ბიზნესების გაკოტრებას, ადამიანების უმუშევრად დატოვებას. გაცილებით სწრაფად გავხსნიდით ქვეყანას ტურიზმისა და ინვესტორებისთვის", — აცხადებს მამუკა ხაზარაძე.

მისივე თქმით, "სამწუხაროა, რომ ისევე, როგორც ბევრ სხვა საქმეში, საქართველოს მთავრობა ამ შემთხვევაშიც მაჩანჩალაა".