ამერიკულმა გავლენიანმა ტექნოლოგიურმა გამოცემამ TechCrunch, რომელიც მაღალტექნოლოგიური კომპანიებისა და სტარტაპების შესახებ სიახლეებს აშუქებს, 500 Startups-ის აქსელერაციის პროგრამაში მონაწილე ფავორიტი კომპანიები დაასახელა. მათ შორის მოხვდა ქართული სმარტ ბრაუზერი Stack, რომელმაც 500 Startups-ის პროგრამაში გასულ წელს ხუთ ფინალისტს შორის დაიკავა ადგილი.

"დღეს 500 Startups-ის 27-ე დემო დღეს შევუერთდით და აქსელერაციაში ჩართულ უახლეს კომპანიებს თვალს ვადევნებთ" ,— წერს TechCrunch.

გამოცემა აღნიშნავს, რომ დემო დღეებში ჩვეულებრივი საქმეები კეთდება, თუმცა ამ ღონისძიებებზე ყოველთვის მონაწილეობენ ისეთი სტარტაპები, რომლებიც სამომავლოდ ტექნოლოგიურ გიგანტებად ყალიბდებიან, ამიტომაც ადევნებენ ისინი ღონისძიებას თვალს.

TechCrunch 500 Startups-ში მონაწილე ფავორიტი სტარტაპების სიაში პირველ ადგილზე ქართულ ბრაუზერს, Stack-ს მოიხსენიებს. მათი თქმით, სტარტაპი ონლაინ ბრაუზინგის ახალ გზას ქმნის.

"ბრაუზერი და ტაბის მოდელი Netscape-ის შემდეგ დიდად არ შეცვლილა, ამასთან, ონლაინ ინფორმაციის ორგანიზება ასობით ტაბში უფრო და უფრო რთულდება. Stack ინფორმაციის ორგანიზების ახალ გზას გვთავაზობს. ის ბევრად უფრო ინტერაქციულია და მარტივი ვიზუალიზაციის საშუალებას იძლევა" , — წერს TechCrunch.

ცნობისთვის, Stack პირველი ქართული სმარტ-ბრაუზერია, რომელიც ინტერნეტში მუშაობას ბევრად ეფექტიანსა და მოქნილს ხდის. მისი მოქმედების პრინციპი მარტივია — ბრაუზერის stack-ებში (დასტებში) სხვადასხვა აპლიკაცია ხარისხდება, რაც ინტერნეტში მუშაობის სრულიად ახლებურ გამოცდილებას აყალიბებს.

Stack გასულ წელს 500 Startups-ის აქსელერაციის პროგრამაში ჩაერთო და მისი დახმარებით გუნდისა და ფინანსების ეფექტიანი მართვა, ანალიტიკური მიდგომების დახვეწა და მომხმარებელთან კომუნიკაციის მეთოდების შეცვლა მოახერხა. აღსანიშნავია ისიც, რომ სტარტაპმა გასულ წელს სხვადასხვა დაფინანსებებთან ერთად $850 000-ის ღირებულების ინვესტიციაც მოიზიდა.