პრემიერმინისტრის, გიორგი გახარიას განცხადებით, დღეს მიიღება გადაწყვეტილება იმის მიზანშეწონილობის შესახებ, რომ მაგალითად, პირბადის ტარების წესის განმეორებით დარღვევის გამო, შესაბამისი ჯარიმა გაორმაგდეს.

"ყველას კარგად უნდა გვესმოდეს, რომ ამ შეზღუდვების შემსუბუქებასთან ერთად ჩვენ წესების დაცვის გამკაცრებაზეც უნდა ვიზრუნოთ, ამიტომ ჩვენ დღეს მივიღებთ გადაწყვეტილებას მიზანშეწონილობის შესახებ იმისა, რომ როდესაც მაგალითად, პირბადის ტარების წესის დარღვევა მოხდება განმეორებით, შესაბამისი სანქცია, ჯარიმა გორმაგდეს. ეს არის ძალზედ მნიშვნელოვანი იმიტომ, რომ ყველას კარგად უნდა გვესმოდეს, რომ თანამედროვე მსოფლიოში ვერავინ, ვერაფერი უფრო ეფექტური პანდემიის წინააღმდეგ, ვიდრე პირბადე, დისტანციის დაცვა, ტესტირება და შემდგომ უკვე ვაქცინაცია ვერ მოიგონა, ამიტომ ჩვენ ყველაფერი უნდა გავაკეთოთ იმისთვის, რომ ეს წესები დავიცვათ ეფექტურად, ეს ჩვენი ეკონომიკის და ჩვენი ყოველდღიური ცხოვრების დაცვის ინტერესშია", — განაცხადა გახარიამ.

მთავრობამ შეზღუდვების შემსუბუქების ახალი ტალღა დააანონსა, რომელიც ორ ეტაპად: 8 და 15 თებერვლიდან დაიწყება. კერძოდ:

  • ორშაბათიდან, 8 თებერვლიდან საქართველოში სრული მასშტაბით ამოქმედდება მუნიციპალური ტრანსპორტი: მეტრო, ავტობუსი და სამარშრუტო ტაქსები.
  • ორშაბათიდან, 8 თებერვლიდან ამოქმედდება ბაზრობები;
  • 15 თებერვლიდან საქართველოს მასშტაბით ბავშვები გააგრძელებენ სწავლას საკლასო ოთახებში;
  • 15 თებერვლიდან კვების ობიექტები, მათ შორის, რესტორნები შეძლებენ ამოქმედდენ ღია სივრცეში.

შეზღუდვების თბილისში, რუსთავსა და ქუთაისსში მოიხსნა, რადგან სხვა ქალაქებში ტრანსპორტი და კვების ობიექტები უკვე ფუნქციონირებდა, სწავლა კი საკლასო ოთახებში მიმდინარეობდა. რაც შეეხება ბაზრობებს მათი გახსნა 15 თებერვალს იყო დაანონსებული.

პრემიერმინისტრ გიორგი გახარიას განცხადებით, კორონავირუსით ინფიცირების დადებითობის მაჩვენებელი იკლებს, რაც შეზღუდვების შემსუბუქების საშუალებას იძლევა. მისივე თქმით, ერთი კვირის თავზე განხილული იქნება შეზღუდვების შემდგომი შემსუბუქება.

"თუმცა ყველას უნდა გვახსოვდეს, რომ რაც უფრო თამამად ვამსუბუქებთ შეზღუდვებს, მით უფრო მეტი პასუხისმგებლობა თითოეული ჩვენგანის იმისთვის, რომ აუცილებელი წესები დაციცვათ. ყველას კარგად უნდა გვესმოდეს, რომ არაგონივრული, არაფრთხილი, სწრაფი შეზღუდვების მოხსნა, გაუქმება, არის პირდაპირი გზა ამ შეზღუდვების თავიდან დაწესების", — განაცხადა მან.

გაიგეთ მეტი: