ე.წ. კარტოგრაფების საქმეზე ბრალდებული, ივერი მელაშვილი აცხადებს, რომ პოპულისტური და "ურაპატრიოტული" განცხადებები ხელს უშლის მოლაპარაკების პროცესს ქვეყნებს შორის საზღვრის დელიმიტაცია-დემარკაციისას.

"ეს პოპულისტური განცხადებაც, ეს "ურაპატრიოტული" განცხადებებიც, ხელს უშლის ამ პროცესს. ვერ მიაღწევ შენ ამ პირობებში, რაგინდ კარგი მომლაპარაკებელი იყო, გაგიჭირდება, ვერ მიაღწევ", — განაცხადა მელაშვილმა TV პირველის ეთერში.

მისი თქმით, ყოფილა შემთხვევები, როცა მსგავს განცხადებებს ხელი შეუშლია მოლაპარაკების პროცესისთვის.

"სამწუხაროდ, პრაქტიკაც გვაქვს ასეთი, რომ აი ასეთი მოვლენები, ეს "ურაპატრიოტული" გამონათქვამები, მასმედიით გაჟღერებული, პრესაში გამოქვეყნებული რაღაც სტატიები ხელისშემშლელი ფაქტორი გამხდარა. ნამდვილად გვაქვს. გინდაც ამ საქართველო-აზერბაიჯანის მონაკვეთზე და კიდევ სხვა მონაკვეთებზე. თუნდაც, საქართველო რუსეთის საზღვარზეც", — ამბობს მელაშვილი.

მელაშვილი აცხადებს, რომ ქვეყნებს შორის საზღვრის დადგენა მხოლოდ დელიმიტაცია-დემარკაციის კომისიის წევრებზე არაა დამოკიდებული და შესაძლოა სხვა პირების მიერ გაკეთებულმა არასწორმა განცხადებებმა, პროცესი ჩიხში შეიყვანოს.

"მომლაპარაკებელს ზურგს უნდა უმაგრებდეს მთავრობა, ადგილზე — მესაზღვრე ჯარისკაცი. იქ, სხვადასხვა მომენტები არის კიდევ. თუნდაც სხვა თემაზე ჩასული მინისტრი რომ ხვდება თავის კოლეგას, მანაც თავისი წვლილი უნდა ... პრეზიდენტი, პრემიერი. და არა ის, რომ გახვიდე იქ და პოზირება გააკეთო კელიებთან და იძახო რომ "ეს ჩემია!" ამითი ვერაფერს ვერ მოიგებ. ამითი შენ პროცესს პრაქტიკულად ჩიხში მიიყვან. შენ შეგნებულად, შენი ინტერესების საწინააღმდეგოდ დგამ ნაბიჯებს, შენი ქვეყნის", — განაცხადა ივერი მელაშვილმა.

ე.წ. კარტოგრაფების საქმეზე ბრალდებულები, ივერი მელაშვილი და ნატალია ილიჩოვა წინასწარი პატიმრობიდან 28 იანვარს, გირაოს სანაცვლოდ გაათავისუფლეს. სასამართლომ თითოეულ ბრალდებულს 20 000-ლარიანი გირაო შეუფარდა. ეს თანხა იმავე დღეს, მოძრაობა #სირცხვილიას ორგანიზებით, ორ საათში სრულად შეგროვდა.

კარტოგრაფების საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

21 იანვარს პროკურატურამ ივერი მელაშვილის კაბინეტში ფარულად გადაღებული ვიდეომასალა გამოაქვეყნა, სადაც ბრალდებულისა და კიდევ ერთი პირის საუბარია აღბეჭდილი. პროკურორ ამირან გულუაშვილის მტკიცებით, ფარულ ჩანაწერებში ბრალდებული ივერი მელაშვილი ადასტურებს, რომ 2006 წლის აგვისტოს შეთანხმებისას დავით გარეჯის მიმდებარედ ქართულმა მხარემ საქართველოს თავდაპირველი პოზიცია უარყო.