მოქალაქეების ერთ-ერთი ლიდერის, ლევან იოსელიანის განცხადებით, ქართულ ოცნებასთან მოლაპარაკებაზე დღეს გიორგი რურუაზე საუბარი არ ყოფილა, რადგან ამაზე უარი განაცხადეს.

"გიორგი რურუაზე და სხვა პოლიტიკურ პატიმრებზე იცით, რომ ძალღონე არ დაგვიკლია არასდროს. ყველა შეხვედრაზე ამაზე ვსაუბრობდით. დღეს ამ საკითხზე ლაპარაკზე განაცხადეს უარი", — განაცხადა იოსელიანმა.

პარტია მოქალაქეების ლიდერმა, ალეკო ელისაშვილმა რამდენიმე წუთის წინ განაცხადა, რომ ქართულ ოცნებასთან შეთანხმების გაფორმების შემდეგ ის და ლევან იოსელიანი საპარლამენტო საქმიანობაში ჩაერთვებიან.

ქართულ ოცნებასა და მოქალაქეებს შორის შეხვედრა დღეს რამდენიმე საათი მიმდინარეობდა. პარტია მოქალაქეების ლიდერები არჩილ თალაკვაძესა და მამუკა მდინარაძეს აქამდეც შეხვდნენ. ელისაშვილის განმარტებით, მათ სურდათ გაერკვიათ, აპირებდა თუ არა მმართველი პარტია კომპრომისზე წასვლას ოპოზიციასთან მოლაპარაკებებისას. მისი თქმით, დეტალურად განიხილეს ოთხივე პუნქტი, რასაც ჯერ კიდევ ფასილიტატორ ელჩებთან მოლაპარაკებებისას ითხოვდნენ. მაშინ მამუკა მდინარაძემ განაცხადა, რომ საბოლოოდ, ქართულ ოცნებასა და მოქალაქებს შორის შეთანხმება შედგება. თუმცა, მანვე აღნიშნა, რომ შეხვედრის დროს მოქალაქეების ლიდერებს პოლიტპატიმრებზე არ ესაუბრნენ.

გუშინ, 28 იანვარს, კარტოგრაფების გირაოს სანაცვლოდ გათავისუფლების შემდეგ, ელისაშვილმა განაცხადა, რომ ეს ყველაფერს ცვლის, რადგან მათთვის ერთ-ერთი მთავარი მოთხოვნა იყო პარლამენტში შესასვლელად. მისივე თქმით, ხვალ პარლამენტში არ შევა, რადგან საარჩევნო საკითხები ჯერ კიდევ არ არის შეცვლილი.