ევროპის საბჭოს საპარლამენტო ასამბლეაზე სიტყვით გამოსვლისას მონიტორინგის ჯგუფის თანამომხსენებელმა, ტიტუს კორლატეანმა ოპოზიციას პარლამენტში შესვლისკენ კვლავ მოუწოდა.

კორლატეანმა აღნიშნა, რომ 31 წლის არჩევნები საქართველოში ძირითადი უფლებებისა და თავისუფლებების დაცვით ჩატარდა, თუმცა იყო ბრალდებები დარღვევებთან დაკავშირებით. გარდა ამისა, მან ხაზი გაუსვა ქვეყანაში არსებულ პოლარიზაციაზე.

"რამდენიმე წლის განმავლობაში ვადევნებდით თვალს პოლარიზაციის ტენდენციას. ჩვენ მოვუწოდებთ მმართველ პარტიას და ოპოზიციას, ყველაფერი გააკეთოთ რათა პოლარიზაციამ დაიწიოს. ჩვენ, ასევე, მოვუწოდებთ ხელისუფლებას სერიოზულად გამოიძიონ დარღვევები და შეასრულონ რეკომენდაციები. ოპოზიციას კი მივმართავ მოწოდებით, დაბრუნდნენ პარლამენტში, რათა თავიდან იქნეს აცილებული პოლარიზაცია, რომელიც გამოწვეულია ოპოზიციის უარით პარლამენტში მუშაობაზე უარის თქმით", — განაცხადა დელეგატმა.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე, რომელიც 21 ნოემბერს ჩატარდა, და არ აპირებენ პარლამენტში შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები დაიწყო. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც.

PACE-ს ზამთრის სესიის სხდომა 25-28 იანვარს გაიმართება. აღნიშნულ სხდომაზე საქართველოსთან დაკავშირებით ორ დოკუმენტს განიხილავენ. პირველი არის ანგარიში სადამკვირვებლო მისიის 31 ოქტომბრის არჩევნებთან დაკავშირებით. ხოლო მეორე არის მონიტორნგის ანგარიში ქვეყანაში მიმდინარე მოვლენებზე.