აჭარის უმაღლესი საბჭოს წევრს მოქალაქეებმა ქუჩაში ნაგავი დააყარეს. ამის ამსახველი ვიდეო ორგანიზაცია ალტერნატივამ გაავრცელა.

დეკემბერში ირაკლი ჩავლეიშვილმა რესპუბლიკური პარტია დატოვა და საბჭოში შესვლა გადაწყვიტა. პარტიის დატოვების მიზეზად მან ბოიკოტთან დაკავშირებით განსხვავებულ პოზიციებს ასახელებს.

როგორც ალტერნატივის მიერ გავრცელებულ ვიდეოკადრებში ჩანს, მოქალაქეები ჩავლეიშვილს ქუჩაში შეხვდნენ. ისინი "მონა, მოღალატეს" სკანდირებდნენ და ეუბნებოდნენ, რომ ის საბჭოში გაყალბებული მანდატით შევიდა.

"რომ შემოვტრიალდი და დამხვდა შვილიშვილის ტოლა ბავშვი, მივხვდი, რომ ახლა იმაზე ხელის გასვრა არ შეიძლებოდა და მე საჯარო პირი ვარ და მაქვს თმენის ვალდებულება. ეს ზუსტად მოქალაქეებისა და ნაციონალური მოძრაობის სახეს აჩვენებს, როგორ უნდათ მათ, ხელისუფლებაში მოვიდნენ და მართონ", — განაცხადა ჩავლეიშვილმა On.ge-სთან.

დღეს, 23 იანვარს ირაკლი ჩავლეიშვილი მივიდა ბულვარში მიმდინარე აქციაზე, სადაც მოქალაქეები 16-სართულიანი შენობის მშენებლობაზე აპროტესტებდნენ. მას აქციის მონაწილეების ნაწილი დაუპირისპირდა.

"ამ პროექტისთვის რას აკეთებთ? სიტყვა უმაღლეს საბჭოში ამაზე გითქვამთ", — ჰკითხა ჩავლეიშვილს ერთ-ერთმა მოქალაქემ.

ფოტო: კადრი ვიდეოდან / ბათუმელები

ჩავლეიშვილის თქმით, ბულვარში მშენებლობის გასაპროტესტებლად მივიდა.

"ბულვარის მიტაცება ამ ხელისუფლების დროს კი არ მოხდა, ყველა ხელისუფლების დროს მოხდა. ეს დაიწყო ნაციონალური მოძრაობს დროს. სად იყო ეს ხალხი მაშინ რომ აპრავებდნენ? მაშინაც ბულვარი იყო, ე.წ. ტექნოლოგიურ უნივერსიტეტს, რომ აშენებდნენ და დღეს ხო ხედავთ. ყველა მთავრობა თავისი წვლილი შეიტანა ჩვენი ბულვარის ოკუპაციაში", — უთხრა მან ბულვარში შეკრებილებს.

როგორც საბჭოს წევრი ამბობს, მას ნაციონალური მოძრაობის "სპეცრაზმი" დაუპირისპირდა. ხოლო ის ადამიანები, ვინც ბულვარის მიტაცება დაიწყო, მისი თქმით, ახლა ჩრდილში არიან.