ცენტრალური ამერიკიდან წამოსული მიგრანტების ჯგუფი აშშ-ს საზღვრისკენ მიემართება. გვატემალას საზღვართან სამართალდამცავებმა გზა ჩაკეტეს და მათ წინააღმდეგ ცრემლსადენი გაზი და ხელკეტები გამოიყენეს.

როგორც BBC წერს, ზოგიერთმა მიგრანტმა უკან დაიხია, ზოგი კი მთებში გაიქცა. გვატემალას ხელისუფლება აცხადებს, რომ არ დაუშვებს ქვეყანაში მასობრივ უკანონო მოძრაობას, ამიტომაც საზღვრებს არ გაუხსნიან.

დაახლოებით 7 ათასი მიგრანტი, ძირითადი ნაწილი ჰონდურასიდან, ჯერ მექსიკაში, იქიდან კი აშშ-ში გადასვლას აპირებს. მიგრანტები ყვებია, რომ ძალადობა და სიღარიბე მათი ყოველდღიურობის ნაწილია. ცენტრალურ ამერიკაში ორი დიდი ქარიშხლის შემდეგ კი მათი ყოფა კიდევ უფრო გაუსაძლისი გახდა. ისინი უმეტესწილად ფეხით, ჯგუფებად მოძრაობენ, რაც "ქარავანის" სახელით არის ცნობილი.

აშშ-ს არჩეულმა პრეზიდენტმა, ჯო ბაიდენმა დაპირება გასცა, რომ თავისი წინამორბედის მკაცრ საიმიგრაციო პოლიტიკას დაასრულებდა. თუმცა მისმა ადმინისტრაციამ მიგრანტები გააფრთხილა, რომ თავი შეიკავონ ამ სახიფათო მგზავრობისგან, რადგან პოლიტიკა მომენტალურად არ შეიცვლება.