საქართველოს ახალგაზრდა იურისტთა ასოციაციას ახალი თავმჯდომარე ჰყავს. ორგანიზაციის გამგეობამ ნიკოლოზ სიმონიშვილი აირჩია, ხოლო მისი მოადგილე გვანცა საკანელაშვილი იქნება.

საია-ს ინფორმაციით, ნიკა სიმონიშვილი საია-ს 2013 წლის იანვრიდან იყო იურიდიული დახმარების ცენტრის სტაჟიორი, ამავე წლის ოქტომბერში კი გახდა იურისტ-კონსულტანტი, ხოლო 2015 წლის მარტიდან ადვოკატი სამოქალაქო და ადმინისტრაციული სამართლის მიმართულებით. ორგანიზაციაში ამბობენ, რომ მას წარმატებით აქვს ნაწარმოები საია-ს არაერთი სტრატეგიული საქმე.

მათივე ინფორმაციით, 2017 წლის მაისიდან 2018 წლის აგვისტომდე სიმონიშვილი მუშაობდა საქართველოს პარლამენტში ადამიანის უფლებათა დაცვისა და სამოქალაქო ინტეგრაციის კომიტეტში წამყვან სპეციალისტად, ხოლო 2018 წლის აგვისტოდან 2020 წლის მარტამდე იყო საიას წარმომადგენელი პარლამენტში და ანალიტიკოსი ადამიანის უფლებების დაცვის პროგრამაში. 2019 წლის ნოემბერში იგი საერთო კრებამ აირჩია საიას გამგეობის წევრად, ხოლო 2020 წლის მარტიდან იყო მედიის სამართლებრივი დაცვის პროექტის ხელმძღვანელი. ორგანიზაციაში ამბობენ, რომ ნიკოლოზ სიმონიშვილი დღემდე აგრძელებს თანამშრომლობას საერთაშორისო ორგანიზაციებთან მოწვეული ექსპერტის რანგში, კანონმდებლობის რეფორმისა და ინსტიტუციური საჭიროებების კვლევის საკითხებში.

საქართველოს ახალგაზრდა იურისტთა ასოციაციის გამგეობის სხდომა დღეს გაიმართა. სიმონიშვილი საია-ს თავმჯდომარის პოსტზე სულხან სალაძეს შეცვლის.