პარტია სამართლიანობის ლიდერის, ეკა ბესელიას განცხადებით, ირაკლი კობახიძეს პარტია მალე დაეშლება. მისი თქმით, მას გუნდშიც კი არ აქვს ავტორიტეტი და წინა მოწვევის პარლამენტის დეპუტატები "ხელდახელ იწევდნენ" მისკენ.

"თქვენ ნახავთ ძალიან მოკლე პერიოდში, კობახიძეს როგორ დაეშლება რეალურად პარტია და მას დარჩება ოფისი. კობახიძე არ არის ის პიროვნება, რომელსაც რაიმე ავტორიტეტი ოდესმე ჰქონდა, მაშინაც კი არ ჰქონდა ეს ავტორიტეტი გუნდში, როცა ის პარლამენტის თავმჯდომარე იყო და ხელდახელ იწევდნენ დეპუტატები მისკენ წინა პარლამენტში. ფიზიკურად უნდოდათ რომ შეხებოდნენ, იმდენად არ ჰქონდა ავტორიტეტი", — განაცხადა ბესელიამ TV პირველთან.

ირაკლი კობახიძე ქართული ოცნების თავმჯდომარის პოსტზე მას შემდეგ წარადგინეს, რაც ბიძინა ივანიშვილმა პოლიტიკიდან წასვლის შესახებ ინფორმაცია გაავრცელა.

ბიძინა ივანიშვილი ქართული ოცნების თავმჯდომარეობას ოფიციალურად 2018 წლის გაზაფხულზე დაუბრუნდა. ივანიშვილის საჯარო გააქტიურებიდან მალევე გადადგა პრემიერმინისტრი, გიორგი კვირიკაშვილი. მისი თავმჯდომარეობის დროს დაწინაურდა და პრემიერმინისტრი გახდა გიორგი გახარია, რომლის შინაგან საქმეთა მინისტრობის დროს ე.წ. გავრილოვის ღამეს აქციის მონაწილეები ძალის გამოყენებით დაშალეს და რამდენიმე ადამიანმა თვალი ან მხედველობა დაკარგა.

ივანიშვილის დაბრუნების შემდეგ კიდევ ერთი პოლიტიკური მეორედ მოსვლა ვიხილეთ, კერძოდ, თავდაცვის მინისტრის პოსტზე დაბრუნდა ყოფილი პრემიერმინისტრი, ირაკლი ღარიბაშვილი.

ბოლო ორწელიწად-ნახევრის განმავლობაში ივანიშვილი არ ყოფილა საჯაროდ აქტიური. თუმცა მან თავი დაამახსოვრა საზოგადოებას საპრეზიდენტო არჩევნებამდე რამდენიმე დღით ადრე გავრცელებული ემოციური მიმართვით, სადაც "მართვის ხარვეზების გამოსასწორებლად" ერთ წელს ითხოვდა.

კიდევ ერთი დაპირება, რომელიც მან გასცა და არ შესრულდა, პროპორციულ არჩევნებს ეხებოდა. ოპოზიციასთან და საერთაშორისო პარტნიორებთან შეთანხმებული სრულად პროპორციული საარჩევნო სისტემა ქართულმა ოცნებამ ჩააგდო. როგორც შემდგომში მმართველ პარტიაში განმარტავდნენ, ბიძინა ივანიშვილის დაპირებას "პრინციპული დეპუტატები" აუმხედრდნენ. "პრინციპული დეპუტატების" ნაწილი ახლაც პარლამენტში, უკვე დაწინაურებულ პოზიციებს იკავებს.

პანდემიის პერიოდში ივანიშვილის გამოსვლები კიდევ უფრო შემცირდა. მისი საჯაროდ ხილვა მხოლოდ საზოგადო მოღვაწეების პანაშვიდებზე, კანდიდატების წარდგენაზე, არჩევნებზე ხმის მიცემის დროს და ბერა ივანიშვილის TikTok-ზე იყო შესაძლებელი. განსაკუთრებული კრიტიკა სწორედ ამ უკანასკნელმა დაიმსახურა. ოპოზიციაში აცხადებდნენ, რომ პანდემიისა და ეკონომიკური კრიზისის ფონზე, ვიდეოში ცეკვა უადგილო იყო.