პარტია მოქალაქეების ლიდერი ალეკო ელისაშვილის თქმით, არაა გამორიცხული რომ ისინი ქართულ ოცნებასთან მოლაპარაკებებზე მარტოც დასხდნენ. ამის შესახებ მან რუსთავი 2-ის ეთერში განაცხადა.

"არ გამოვრიცხავთ ქართულ ოცნებასთან მოლაპარაკებებზე ცალკე დავსხდეთ, უბრალოდ არ გვინდა, რომ მოლაპარაკება ჩაიშალოს. იმიტომ, რომ გაცილებით მარტივი იქნება მერე ქართული ოცნებისთვის ჩვენი გადაგდება და მოტყუება, რასაც ელჩების თანდასწრებით ვერ იზამენ. რა თქმა უნდა, ჩვენთვის გაცილებით კომფორტია, რომ სხვებიც იყვნენ და ელჩები იყვნენ და მონაწილეობდნენ. ამიტომ არაფრით არ გვინდა, რომ ეს ჩაიშალოს. სხვა გზა თუ არ დაგვრჩა და აქეთ ოპოზიციამ ფეხები აბაკუნა და მარტო რევოლუცია და ავამღვრიოთ წყალიო იძახა, მეორე მხრივ, თუ ქართული ოცნებაც არ მოვიდა იმ შეხვედრაზე, რაღაცა იქნება შესაცვლელი", — ამბობს ელისაშვილი.

11 დეკემბერს მეათე მოწვევის პარლამენტმა ოფიციალურად დაიწყო მუშაობა. ოპოზიციის წარმომადგენლები არჩევნების ლეგიტიმურობას არ აღიარებენ და პარლამენტში არ შედიან. ისინი მოითხოვენ, არა მხოლოდ რიგგარეშე არჩევნების დანიშვნას, არამედ პოლიტმატიმრების გათავისუფლებასა და საარჩევნო ადმინისტრაციის თავმჯდომარის, თამარ ჟვანიას გადაყენებას.

ოპოზიციონერებმა მანდატების გაუქმების შესახებ ცესკოს უკვე მიმართეს. სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.