ჯანდაცვის მინისტრის, ეკატერინე ტიკარაძის განცხადებით, საქართველოში კორონავირუსის სავარაუდო მესამე ტალღა, შესაძლოა, თებერვლის მეორე ნახევრიდან დაიწყოს.

"ევროპაში მესამე ფაზა უკვე დაწყებულია. ჩვენ მეორე ფაზა გვქონდა შედარებით მოგვიანებით, ვიდრე ევროპას. აქედან გამომდინარე, სავარაუდო მესამე ტალღა, შესაძლოა, იყოს თებერვლის მეორე ნახევრიდან", — განაცხადა ეკატერინე ტიკარაძემ.

მისი თქმით, მაშინ, როდესაც მსოფლიო საუბრობს მესამე ტალღაზე, საქართველო ვერ იქნება გამონაკლისი, თუმცა, ამ კომპონენტშიც მნიშვნელოვანია, რომ გავითვალისწინოთ ყველა ის არსებული გამოცდილება, რაც არის მსოფლიოში და რაც საქართველომ დააგროვა.

13 იანვრის მონაცემებით, საქართველოში კორონავირუსის ახალი 1 618 შემთხვევა დადასტურდა, გამოჯანმრთელდა 403 ადამიანი, ხოლო გარდაიცვალა — 26.

ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 243 255-ს. გამოჯანმრთელებულთა რაოდენობა გაიზარდა 227 611-მდე, ხოლო გავრცელებიდან დღემდე ვირუსს ჯამში 2 846 პირი ემსხვერპლა.