ევროპული საქართელოს ერთ-ერთი ლიდერის, გიგა ბოკერიას თქმით, "ივანიშვილის რეჟიმმა" ამნისტიით დაადასტურა ის, თუ როგორ "უტიფრად" იყენებს ყველაფერს პოლიტიკური დაკვეთისათვის.

"მთავარი საკითხია, თუ რისი დემონსტრირება მოახდინა ივანიშვილის რეჟიმმა კიდევ ერთხელ ამ ამნისტიით, როცა გიორგი რურუას მუხლი ამოიღო, უფრო მძიმე მუხლები არის დატოვებული, ეს კი ამოღებულია, ეს არის დასტური, რომ ის პოლიტპატიმარია და დასტურია იმის, თუ როგორ უტიფრად იყენებენ ყველაფერს პოლიტიკური დაკვეთისათვის და ამოცანებისათის, მათ შორის ამნისტიასაც", — განაცხადა ბოკერიამ.

საქართველოს პარლამენტმა დღეს მესამე მოსმენით ამნისტიის შესახებ კანონი დაამტკიცა. კანონპროექტს მხარი 83-მა დეპუტატმა დაუჭირა, მოწინააღმდეგე არცერთი იყო. ამნისტია ისეთ დანაშაულებს შეეხება, როგორებიცაა:

  • ქურდობა;
  • ფალსიფიკაცია;
  • ქონების დაზიანება;
  • სხეულის დაზიანების ზოგიერთი კატეგორია და სხვა.

კანონის საფუძველზე, სისხლისსამართლებრივი პასუხისმგებლობისა და სასჯელისგან თავისუფლდებიან საქართველოს სისხლის სამართლის კოდექსით (საქართველოს საკანონმდებლო მაცნე, №41(48), გათვალისწინებული ზოგიერთი დანაშაულის ჩადენისათვის ბრალდებული და მსჯავრდებული პირები, ასევე, დანიშნული სასჯელი უმცირდებათ ან უფრო მსუბუქი სასჯელით ეცვლებათ ცალკეული დანაშაულების ჩადენისათვის მსჯავრდებულ პირებს.

კანონპროექტი სისხლის სამართლის პასუხისმგებლობისგან იმ პირთა გათავისუფლებას ითვალისწინებს, რომელთაც ამ კანონპროექტით გათვალისწინებული ცალკეული დანაშაულები 2020 წლის 11 დეკემბრამდე ჩაიდინეს. კანონპროექტით არ არის გათვალისწინებული ზოგიერთი ისეთი დანაშაული, როგორიცაა მკვლელობა ან ოჯახური ძალადობა.

მეორე მოსმენის შემდეგ დოკუმენტში რედაქციული ცვლილებები შევიდა. ადამიანის უფლებათა დაცვის კომიტეტის თავმჯდომარის, მიხეილ სარჯველაძის განცხადებით, კერძოდ, დათქმა გაკეთდება, რომ სისტემატიური ცემის გარდა, 126-ე მუხლის პირველი სეკუნდა ნაწილი ამნისტიით მოცული იქნება.

რაც შეეხება სხვა დანაშაულებისთვის მსჯავრდებულ პირებს, რომელთაც შეფარდებული აქვთ უვადო თავისუფლების აღკვეთა, კომიტეტის თავმჯდომარის განმარტებით, მათთან მიმართებით დღეს მოქმედი კანონმდებლობა სასჯელის შეცვლის, შემსუბუქების საკმაოდ არამკაფიო დებულებებს შეიცავს.