სავაჭრო ცენტრ ბავშვთა სამყაროს დირექტორი, გიორგი მაჭავარიანი სირცხვილს უწოდებს საქართველოს ყოფილი პრემიერ-მინისტრის ბიძინა ივანიშვილის მიმართ გამოთქმულ ბრალდებებს - სავაჭრო ცენტრის დაწვის საქმესთან დაკავშირებით მის ინტერესს. ამის შესახებ ბავშვთა სამყაროს დირექტორმა ტელეკომპანია იმედის პირდაპირ ეთერში განაცხადა:

„სირცხვილია, რა, ადამიანები ვართ, ქართველები ვართ, ყველაფერი რომ ბრალდებოდეს ბატონ ბიძინა ივანიშვილს, ბრალდებოდეს ასევე იმ აქციონერს, რომელიც ამ ხალხისთვის, იმის მერე რაც შეიძინა გარკვეული აქციები ჩვენს საწარმოში, გაკეთების მეტი არაფერი გაუკეთებია. 30 წლის განმავლობაშ ბავშვთა სამყაროში ქვა ქვაზე რომ არ დადებულა ამ სამი წლის განმავლობაში მთლიანად გარემონტდა... მილიონ-ნახევარი გვაქვს დახარჯული ამ სამ წელიწადში,“ - აღნიშნა გიორგი მაჭავარიანმა.

მისი თქმით, საგამოძიებო სამუშაოების დასრულების შემდეგ დაიწყება შენობის რეაბილიტაციაზე მუშაობა. როგორც მაჭავარიანმა აღნიშნა, საგამოძიებო მოქმედებების მალე დასრულების შემთხვევაში შენობის რეკონსტრუქცია დაახლოებით 2 წელში დასრულდება.

„ჩვენ ჩვენი მხრიდან რაც არის გასაკეთებელი იმას გავაკეთებთ, ამაზე უარს არ ვიძახიდით, ის რომ მთელი ქონების ანაზღაურება ჩვენს თავზე ავიღოთ მას ფიზიკურად ვერ შევძლებთ, ეს ხალხმაც იცის და არანაირი პრობლემა არ აქვთ ხალხს. ჩვენ ძალიან კარგი საუბარი გქვონდა,“ - განმარტა ბავშვთა სამყაროს დირექტორმა.

ბავშვთა სამყაროში ხანძარი 30 იანვარს გაჩნდა.