საქართველოში ბევრი ჩვენგანისთვის, როცა გვინდა, რომ რაღაც ძალიან სწრაფად, მარტივად და იაფად ვჭამოთ, აზიური ნუდლსის ნახევარფაბრიკატი საუკეთესო გამოსავალია ხოლმე.

ზუსტად ხუთი წუთია საჭირო, რომ აყმუვლებული კუჭი დაიმშვიდო. რამდენად ჯანსაღად, ეს ცალკე საკითხია, მაგრამ მაინც...

ფოტო: Giphy

სულ მალე ზუსტად ამავე პრინციპით იაპონიაში ტრადიციული ქართული კერძის — შქმერულის ნახევარფაბრიკატი გამოჩნდება: ამის შესახებ ინფორმაცია იაპონიაში საქართველოს საელჩომ გაავრცელა.

საელჩოს ცნობით, ამ ახალი პროდუქტის შექმნაზე იაპონიის სწრაფი მომზადების კერძების უდიდესი მწარმოებელი, კომპანია NISSIN მუშაობდა და უკვე გასაყიდად მზადაა შქმერულის ნახევარფაბრიკატი, რომელიც მთელი იაპონიის მასშტაბით თითქმის ყველა წამყვან ქსელში (საერთო ჯამში 50 ათასამდე მაღაზია) იქნება ხელმისაწვდომი.

ეს რას ნიშნავს, რომ ქართველობას გვართმევენ?!

ფოტო: Tenor

პასუხი ცალსახად ცხადია: არა. მეტიც, როგორც თავადვე შეგიძლიათ დაინახოთ, პროდუქტის შეფუთვაზე გამოსახულია საქართველოს დროშა: როგორც საელჩოში აცხადებენ, მწარმოებლები აქტიურად თანამშრომლობდნენ ქართულ წარმომადგენლობასთან, რათა კერძის ტრადიციული წარმოშობა მაქსიმალურად ყოფილიყო შენარჩუნებული.

"კერძის აღწერაში ხაზგასმული იქნება, რომ შქმერულის სამშობლო მდიდარი ბუნებით, ქვევრის ღვინითა და გემრიელი სამზარეულოთი არის ცნობილი", — ვკითხულობთ იაპონიაში საქართველოს საელჩოს განცხადებაში.

კომპანია NISSIN-ის საიტზე უკვე წარმოდგენილია პროდუქტის აღწერაც და ისიც, თუ როგორ გამოიყურება შქმერულის ნახევარფაბრიკატი დაახლოებით:

ფოტო: Nissin

შესაბამისად, ამიერიდან იაპონიაში, ალბათ, კიდევ უფრო მეტად გაიზრდება საქართველოს შესახებ ცნობადობა, ამავდროულად კი იქაური ბებიები ქართველი ბებიების მსგავსად თავიანთ შვილიშვილებს დაუცაცხანებენ, თუ შქმერულის ნახევარფაბრიკატებს ზედმეტად მიეძალებიან.