დღეს, 19 მაისს, პარლამენტის თავჯდომარემ, დავით უსუფაშვილმა ე.წ. კაბელების საქმესთან დაკავშირებით განაცხადა, რომ კითხვები უფრო მეტი დარჩა, ვიდრე პასუხები:

"მგონია, რომ ამ საქმის საბოლოო სამართლებრივი და პოლიტიკური შედეგი საბოლოოდ კიდევ წინ არის და ეს თემა დახურული და დასრულებული არ არის. ეს არი არის კარგი მოვლენა, მაგრამ დარწმუნებული ვარ, რომ ყველა კითხვას პასუხი გაეცემა, სამართლებრივადაც და პოლიტიკურადაც. საკითხი ჯერ დახურული არ არის და წელიწადნახევარი არ აღმოჩნდა საკმარისი ამისთვის".

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ ცნო და მათ 7-წლიანი პატიმრობა მიუსაჯა.

პროკურატურა დაკავებულებს სახელმწიფოს კუთვნილი 4 მილიონის გაფლანგვას ედავება, რასაც ბრალდებულები არ ეთანხმებიან და საქმეს პოლიტიკურად მოტივირებულს უწოდებენ. თავის მხრივ, პროკურატურა მიიჩნევს, რომ სასამართლომ ადეკვატური და მტკიცებულებებზე დამყარებული გადაწყვეტილება მიიღო.