იუსტიციის ყოფილი მინისტრი და მე-10 მოწვევის პარლამენტის დეპუტატის, თეა წულუკიანის განცხადებით, ის დიმიტრი ხუნდაძის ინიციატივას არ ემხრობა

"არავითარ შემთხვევაში მე არ ვემხრობი", — განაცხადა წულუკიანმა.

მისივე თქმით, არ ფიქრობს, რომ ხუნდაძის ინიციატივა უმრავლესობის მხარდაჭერას მიიღებს.

ქართული ოცნების დეპუტატმა, დიმიტრი ხუნდაძემ განაცხადა, რომ ოჯახში ძალადობა ემოციურ ფონზეც ხდება და ამნისტიის შესახებ კანონპროექტში ეს გათვალისწინებული უნდა იყოს.

ხუნდაძემ განმარტა, რა შემთხვევაში უნდა შეეხოს ამნისტია ოჯახში ძალადობაში ბრალდებულ პირებს.

"თუ ადამიანმა ეს ემოციურ ფონზე ჩაიდინა (რა თქმა უნდა, გამართლება შორსაა ამისგან), თუ დახასიათება ისეთია, რომ რისკები მინიმალურ დონეზე იქნას აღქმული, ოჯახიც თანახმაა, ამ სოციალურ ვითარებაში, მე ვფიქრობ, ეს იქნებოდა არა მხოლოდ კარგი, არამედ ძალიან კარგი და აუცილებელიც", — აღნიშნა დიმიტრი ხუნდაძემ.

მისივე თქმით, თუ ძალადობის შემთხვევა არის მეორე ან მესამე, პირიქით, უკვე აღარ უნდა გაითვალისწინონ ოჯახის თანხმობა, რადგან ციხიდან გამოსულ მოძალადეს, შესაძლოა, პირიქით, ისევ სამაგიეროს გადახდის სურვილი გაუჩნდეს, ამიტომ ამ ტიპის მოძალადეებს ამნისტია არ უნდა შეეხოთ.