განათლების მინისტრის მოადგილემ, ეკატერინე დგებუაძემ პარლამენტის პლენარულ სხდომაზე წარადგინა ინიციატივა, რომლის თანახმადაც განათლების სამინისტრო ითხოვს, რომ ბაღების ავტორიზაციის პროცესმა ერთი წლით გადაიწიოს. ამ ინიციატივაზე კი განათლების კომიტეტის თავმჯდომარემ, თეა წულუკიანმა ახსნა და დასაბუთება მოითხოვა, თუ რა გააკეთა სამინისტრომ გასული 4 წლის განმავლობაში და რას გააკეთებდა მოთხოვნილ ერთ წელში.

"რაკი გადავადებას ითხოვთ, ცოტა მეტი დასაბუთება გვჭირდება, რატომ უნდა დავუჭიროთ ჩვენ ამას მხარი. გადავადებების პრაქტიკა კარგად ვიცი, არ ვარ, მთავრობისგან შორს მყოფი ადამიანი. როცა გადავადებას ითხოვთ, კარგად უნდა ახსნათ, რაში არ გეყოთ 4 წელი. სამტრედიის სკოლ-პანსიონის თემა, საბჭოთა დროის გადმონაშთი რომ არის და იქ ბავშვთა უფლებების მხრივ არაფერი კარგი არ ხდება, 1 სექტემბერს იყო ვადა, როცა ამაზე პროექტი უნდა დასრულებულიყო და დაწყებულიც არ არის. ამიტომ დასაბუთებაა საჭირო, რა გაკეთდა და ეს ერთი წელი რის დასასრულებლად გჭირდებათ", — განაცხადა თეა წულუკიანმა.

განათლების მინისტრის მოადგილემ, გადავადების მოთხოვნა პანდემიით ახსნა და განაცხადა, რომ პანდემიის გამო ბაღებში სააღმზრდელო პროცესზე შეუძლებელი გახდა, ამიტომ უფრო ეფექტიანი დაკვირვებისთვის, საჭიროა გადავადება. ამაზე კი თეა წულუკიანმა უპასუხა, რომ პანდემია არ დაწყებულა 4 წლის წინ, ამიტომ, სასურველი იქნება, თუ მინისტრის მოადგილე თვეში ერთხელ განათლების კომიტეტის წინაშე წარდგება და ანგარიშს მოახსენებს, თუ რა გაკეთდა.

"პანდემია 4 წლის წინ არ იყო, პანდემია, თუ მახსოვრობა არ მღალატობს, გაჩნდა ჯერ ერთი წელიც არ არის გასული, მაგრამ დავანებოთ ამას თავი. ორი რამ მინდა, შემოგთავაზოთ, ერთი ის, რომ დარგობრივი კომიტეტი ვართ, კი ბატონო, გადავავადოთ ერთი წელი, სადაც ოთხი წელი ვერ შევძელით, ერთი წლის თავზე, იქნებ, შევძლოთ. იქნებ, თვეში ერთხელ, მობრძანდეთ ჩვენს კომიტეტში და მოგვახსენოთ, რა გააკეთეთ იმიტომ, რომ გაისად ამ დროს ისევ არ მოხვიდეთ და არ მოითხოვოთ გადავადება. რა თქმა უნდა, იქნება ისეთი რაღაცები, ან ბიუჯეტი ვერ გაწვდება, ან ყველა ბაღი ვერ დააკმაყოფილებს. რომ ვერ დააკმაყოფილებს, იმასთან დაკავშირებით რა ხედვა გაქვთ, ხედვა ხომ უნდა არსებობდეს. მასიურად ხომ ვერ დავკეტავთ ბაღებს. ან გადავარქვათ სახელი და ეს არ იქნება ის დაწესებულება, სადაც მშობელს მოლოდინი აქვს, რომ იქ ბავშვი რაღაცას ისწავლის", — აღნიშნა თეა წულუკიანმა.

განათლების მინისტრის მოადგილე, ეკატერინე დგებუაძე ადრეული და სკოლამდელი აღზრდისა და განათლების შესახებ კანონში შესატან ცვლილებაზე ინიციატივა წარადგინა, რომ ბაღების ავტორიზაციის პერიოდი ნაცვლად 2020 წლის 31 დეკემბრისა, გახანგრძლივდეს და განისაზღვროს 2021 წლის 31 დეკემბრით.