დაავადებათა კონტროლის ცენტრის დირექტორის მოადგილე, პაატა იმნაძე ამბობს, რომ ახალი წლის ღამის ეშინია და ვირუსის გავრცელების დინამიკა იმაზეა დამოკიდებული, როგორ ჩაივლის ეს დღეები. მისივე თქმით, ამ ეტაპზე პროგნოზები დამაიმედებელია.

"დაავადების გავრცელების დინამიკაზე პროგნოზები საკმაოდ დამაიმედებელი შეიძლება გვქონდეს, თუ ახალი წლის ღამემ ჩვენი იმედები არ გააწბილა. იმიტომ, რომ მაღაზიებთან რაც არის დაკავშირებული, დღეს რასაც ვუყურებ, მაქსიმალურად დაცულია დისტანციაც, პირბადეც. ასე, რომ დიდ გართულებებს არ უნდა ველოდოთ სავაჭრო წერტილებიდან, მაგრამ ახალი წლის ღამე ძალიან მაშინებს, პირდაპირ ვიტყვი, როგორ გავივლით ამ პერიოდს. ყველა პროგნოზი ისეთია, რომ უნდა ვაკონტროლოთ სიტუაცია კარგად იანვრის მეორე ნახევარში", — განაცხადა მან პალიტრანიუსის ეთერში.

ახალი წლის ღამეს გადაადგილების შეზღუდვა საგამონაკლისო წესით იხსნება. ასეთივე გამონაკლისი არის დაშვებული მართლმადიდებლურ შობაზე. სხვა კონფესიებს მსგავსი პრივილეგიით არ უსარგებლიათ.