ევროპული საქართველოს ლიდერის, დავით ბაქრაძის განცხადებით, პარტიიდან ელენე ხოშტარიას წასვლა სიახლე არ ყოფილა და მათ ამის შესახებ დიდი ხნის განმავლობაში იცოდნენ. გარდა ამისა, მან დაამატა, რომ პარტიაში დაპირისპირება არ ყოფილა.

როგორც ბაქრაძემ ჟურნალისტებთან განმარტა, ელენე ხოშტარიას გადაწყვეტილება ჰქონდა მიღებული, რომ არჩევნების შემდეგ დამოუკიდებელ პოლიტიკურ საქმიანობას დაიწყებდა და სამოქალაქო აქტივიზმზე უფრო მეტი აქცენტის გაკეთებას.

"ამიტომ, როგორც არ უნდა დასრულებულიყო ეს არჩევნები, ჩვენთვის ეს სიახლე და სიურპრიზი არ ყოფილა, ეს იყო ის, რაზეც ჩვენ პარტიის შიგნით ვიცოდით და რაზეც ვიყავი მოლაპარაკებული. წარმატებას ვუსურვებ მის ახალ გზაზე ელენეს. ვფიქრობ, რომ მიზანი გვაქვს საერთო, მიზანი არის ამ ქვეყანაში განვითარება, წინსვლა და ნორმალური დემოკრატიული საზოგადოების ჩამოყალიბება", — განაცხადა ბაქრაძემ.

ელენე ხოშტარიამ ოფიციალურად დაადასტურა, რომ პარტია ევროპულ საქართველოს ტოვებს და დამოუკიდებელ პოლიტიკურ საქმიანობას იწყებს.

ელენე ხოშტარია 2016-2020 წლებში საქართველოს მე-9 მოწვევის პარლამენტის წევრი იყო. 2017 წელს ევროპულმა საქართველომ თბილისის მერობის კანდიდატად წარადგინა. რაც შეეხება 2020 წლის საპარლამენტო არჩევნებს, აქ ხოშტარია ვაკის მაჟორიტარულ ოლქში ოპოზიციის დეპუტატობის კანდიდატი იყო