რუსეთის დუმამ 380 ხმით 3-ის წინააღმდეგ ოჯახში ძალადობის დეკრიმინალიზაცია მოახდინა, თუ ის სხეულის მნიშვნელოვან დაზიანებას არ გამოიწვევს და წელიწადში მხოლოდ ერთხელ მოხდება. ინფორმაციას USA Today ავრცელებს.

დუმის გადაწყვეტილება მოძალადე პირს სისხლის სამართლის პასუხისმგებლობისგან ათავისუფლებს. ამ შემთხვევაში ის $500-ის ეკვივალენტის ჯარიმას გადაიხდის ან 15 დღეს გაატარებს საპატიმროში და შემდეგ გათავისუფლდება, იმ პირობით, რომ მომავალი 12 თვის განმავლობაში იგივეს აღარ გაიმეორებს.

გადაწყვეტილება ზედა პალატას გადაეცემა, სადაც საწინააღმდეგო პოზიცია მოსალოდნელი არაა. ამის შემდეგ მას ხელი ვლადიმერ პუტინმა უნდა მოაწეროს, რომელმაც კანონის განახლებას მხარდაჭერა უკვე გამოუცხადა.

კრემლის პრესსამსახურის თანამშრომელმა დიმიტრი პესკოვმა ჟურნალისტებს განუცხადა, რომ ოჯახური კონფლიქტები კონსტიტუციაში "ოჯახურ ძალადობად" არ უნდა განიხილებოდეს.

რუსეთის დუმაში 450 დეპუტატიდან 57 ქალია.