გენერალ ბენ ჰოჯესის განცხადებით, არსებობს განცდა, რომ ბოლო 2 წლის მანძილზე საქართველომ დასავლური ინტეგრაციის პროცესში უკან დახევა დაიწყო. ამის შესახებ მან ფორმულასთან ინტერვიუში ისაუბრა.

"რა თქმა უნდა, მე პატივს ვცემ საქართველოს მთავრობას და პრეზიდენტს, არ მაქვს სურვილი ცხვირი ჩავყო შიდა საქმეებში, მაგრამ როდესაც საქართველოს სტრატეგიულ მდებარეობას ვაკვირდები, არაფერი კარგი არ გამოვა იქიდან, რომ საქართველოში, სომხეთსა და აზერბაიჯანში რუსეთს თავისი ძალები ჰყავს. არ ვფიქრობ, რომ ეს უსაფუძვლო აჟიოტაჟია. მე მინდოდა მენახა საქართველოს მთავრობა უფრო ნათელი და მკაფიო პოზიციით საკუთარი სუვერენიტეტისა და იმ სურვილის შესახებ, რომ მოხდეს სრული ინტეგრაცია დასავლეთთან. თუ შეუერთდება რუსეთის მიერ დომინირებულ პლატფორმას, არ იქნება სწორი მიდგომა", — განაცხადა მან.

მანვე აღნიშნა, რომ ვერ ხედავს რეალურ განცხადებებს და ნაბიჯებს საქართველოს მთავრობის მხრიდან, რათა უფრო მიმზიდველი გახდეს საქართველო.

"არსებობს გრძნობა, რომ უკანასკნელი ორი წლის განმავლობაში საქართველომ დაიწყო უკან დახევა დასავლური ინტეგრაციის პროცესში. ბიზნესის თვალთახედვით, ვერ ვხედავ, რომ საქართველოს მთავრობა რამეს აკეთებდეს, რათა უფრო მიმზიდველი გახადოს ქვეყანა დასავლეთისთვის. ვერ ვხედავ რეალურად ძლიერ განცხადებებს, რომლებიც მოდის მთავრობიდან, თუ რას აკეთებს კრემლი", — განაცხადა ჰოჯესმა.