იუსტიციის ყოფილი მინისტრი და პარლამენტის განათლების კომიტეტის თავმჯდომარე, თეა წულუკიანი გირჩის ბიბლიურ თავისუფლებას, რომელიც მსურველებს სასულიერო პირებად არეგისტრირებს და შედეგად, მათ შეუძლიათ უარი თქვან სავალდებულო სამხედრო სამსახურზე, "ანტისახელმწიფოებრივად მოწმედ პოლიტიკურ ძალას" უწოდებს. დეპუტატის თქმით, ამ იდეებით "მანიპულირების" შედეგად, გირჩს "პლეხანოვზე" განათლებულმა და პატივსაცემმა ახალგაზრდებმა მისცეს ხმა.

"ჩვენ ალბათ უნდა გვაშფოთებდეს ის, რომ ანტისახელმწიფოებრივი იდეები თავისუფლებად არის მონათლული და ამას არაერთი ახალგაზრდა იზიარებს. ეს მე მაშფოთებს და ვიცი, არ ვარ ამაში მარტო, რომ ჩემს მშობლიურ უბანში, თბილისში, ე.წ. პლეხანოვზე, ისეთი ანტისახელმწიფოებრივი იდეებით მანიპულირების შედეგად, როგორიცაა, მაგალითად, გახდი ეპისკოპოსი და არ წახვალ ჯარში, არაერთმა განათლებულმა და პატივსაცემმა ახალგაზრდამ ანტისახელმწიფოებრივად მოქმედ პოლიტიკურ ძალას მასიურად მისცა ხმა", — განაცხადა წულუკიანმა პარლამენტში სიტყვით გამოსვლისას.


მან 20 წუთზე მეტხანს ისაუბრა იმ პრობლემებზე, რომლებიც, მისი აზრით, განათლების სექტორს აქვს და დიდი დრო დაუთმო "ტრენდებზე" საუბარსაც.


"ტრენდებსა და ცრუ დადებითს უნდა ვებრძოლოთ. ხარისხიანი განათლებისა მიცემის გარდა, განათლებისა და კულტურის სისტემები ამაზეც უნდა მუშაობდნენ, რომ გვინდა არა მხოლოდ ფეხის ხმას აყოლილი ახალგაზრდა, არამედ რეალურად თავისუფალი ადამიანი", — აღნიშნა მან.