პრეზიდენტის მიერ შეწყალების აქტის გამოცემის შემდეგ, ე.წ. კაბელების საქმეზე მსჯავრდადებულებმა საპატიმრო დაწესებულება უკვე დატოვეს.

გათავისუფლებულებმა ჟურნალისტებს განუცხადეს, რომ სახელისუფლებო შტოებიდან მხოლოდ პრეზიდენტმა შეძლო გადაედგა გაბედული ნაბიჯი და დაეხსნა ისინი პატიმრობიდან. ისინი ამბობენ, რომ აუცილებლად გააგრძელებენ ბრძოლას საკუთარი სიმართლის დასამტკიცებლად.

საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავება პროკურატურა უკვე მსჯავრდებულ 5 პირს. თავდაცვის სამინისტროს თანამშრომლების დაკავებას იმ დროს მოჰყვა თავდაცვის მინისტრის, ირაკლი ალასანიას გადადგომა და კოალიცია ქართული ოცნებიდან თავისუფალი დემოკრატების გასვლა.

26 იანვარს თბილისის სააპელაციო სასამართლომ ე.წ. კაბელების საქმეზე გადაწყევტილება გამოაცხადა, რომლის მიხედვითაც, მათ მიერ წაყენებული ბრალდება - საბიუჯეტო თანხების გაფლანგვა გადაკვალიფიცირდა სამსახურებრივი უფლებამოსილების გადამეტებით. რომ არა პრეზიდენტის შეწყალება, სააპელაციო სასამართლოს გადაწყვეტილების შემდეგ, ისინი საპატიმროს დაახლოებით 2 თვეში მაინც დატოვებდნენ.