თბილისის სააპელაციო სასამართლომ ე.წ. კაბელების საქმეზე გადაწყევტილება გამოაცხადა, რომლის მიხედვითაც, მათ მიერ წაყენებული ბრალდება - საბიუჯეტო თანხების გაფლანგვა, გადაკვალიფიცირდა სამსახურებრივი უფლებამოსილების გადამეტებით.

როგორც ადვოკატმა, ლევან სამუშიამ ჟურნალისტებს განუცხადა, სამართლიანი იქნებოდა, რომ სასამართლოს გამამართლებელი განაჩენი გამოეტანა. იმის გამო, რომ დაცვის მხარე მიღებულ გადაწყვეტილებას არ ეთანხმება, მას უზენაეს სასამართლოში გაასაჩივრებს. როგორც სამუშიამ თქვა, სასამართლომ დაადასტურა, რომ თავდაცვის სამინისტროს ყოფილ თანამშრომლებს თანხა არ გაუფლანგავთ. სწორედ ამიტომ, ისინი საპატიმროს ორ თვეში დატოვებენ, რადგან მათი შვიდწლიანი საპატიმრო სასჯელი შეიცვალა 1,5-წლიანი პატიმრობით.

თავის მხრივ, სააპელაციო სასამართლოს გადაწყვეტილებას უზენაეს სასამართლოში გაასაჩივრებს პროკურატურა, რადგან უწყებას მიაჩნია, რომ საპელაციო ინსტანციამ, გადაწყვეტილების გამოტანისას, მტკიცებულებებითა და ფაქტებით არ იხელმძღვანელა.

საქმე ეხება თავდაცვის სამინისტროს მიერ განხორციელებულ ე.წ. კაბელების პროექტს, რომლისთვისაც 2013 წელს სახელმწიფოს სარეზერვო ფონდიდან 6 720 877 ლარი გამოიყო, თუმცა პროკურატურის მტკიცებით, აღნიშნული პროექტის განხორციელებისათვის მხოლოდ 2 618 005 ლარი იყო საჭირო. სწორედ ამ რიცხვებს შორის სხვაობის - 4 102 872 ლარის გაფლანგვას ედავებოდა პროკურატურა თავდაცვის სამინისტროს 5 ყოფილ თანამშრომელს. აღნიშნული პირების დაკავებამ დაუდო საფუძველი თავის დროზე განხეთქილებას თავისუფალ დემოკრატებსა და ქართულ ოცნებას შორის, რის შემდეგაც ირაკლი ალასანიამ თავდაცვის მინისტრის პოსტი დატოვა.