იუსტიციის ყოფილი მინისტრი და მე-10 მოწვევის პარლამენტის განათლების, მეცნიერებისა და კულტურის კომიტეტის თავმჯდომარე, თეა წულუკიანი, მთავრობაში შესაძლო სტრუქტურულ ცვლილებებსა და მისი კულტურის მინისტრად დანიშვნის შესახებ გავრცელებულ ინფორმაციას პირდაპირ არ უარყოფს. ფორმულასთან კომენტარში წულუკიანი ამბობს, რომ ჯერ უნდა მოხდეს სტრუქტურული ცვლილებები და მერე იმსჯელებს ამაზე.

"თუ შემომთავაზებენ, სერიოზულად დავფიქრდები, როგორც ყველა სერიოზულ შემოთავაზებაზე", — განაცხადა წულუკიანმა.

მისი თქმით, მას შემდეგ, რაც კულტურის სამინისტრო, როგორც დამოუკიდებელი უწყება გაუქმდა და რამდენიმე სამინისტრო გაერთიანდა, კულტურის სფეროს ინტერესები "ჩაიკარგა" სხვა სფეროებში და სამთავრობო გუნდს ამის გამოსასწორებლად უმსჯელია.

"მე დარწმუნებული ვარ, რომ კულტურის სფერო, რაც ორი სამინისტრო და უფრო მეტიც გაერთიანდა, თითქოს ის ინტერესები, რაც არის დასაცავი, ჩაიკარგასავით, ამიტომ, რა თქმა უნდა, ყოფილა მსჯელობა, როგორც გამოვასწოროთ ეს. მიიღებს თუ არა ეს გამოსწორება ცალკე სამინისტროდ ჩამოყალიბების ფორმას თუ არა, ეს ჯერჯერობით უცნობია. მე ვფიქრობ, რომ უნდა დაველოდოთ მთავრობის დამტკიცებას, რადგან მე, როგორც მთავრობის ყოფილი წევრი, ვფიქრობ, რომ ეს უნდა იყოს სამთავრობო ხედვა და არა დეპუტატის ინიციატივა", — განაცხადა თეა წულუკიანმა.

თეა წულუკიანი, რომელიც 8 წლის განმავლობაში იკავებდა იუსტიციის მინისტრის პოსტს და ქართული ოცნების ყველაზე გრძელვადიან მინისტრად ითვლება, მე-10 მოწვევის პარლამენტის განათლების, მეცნიერებისა და კულტურის კომიტეტის თავმჯდომარე გახდა.