ტვ იბერიას ჟურნალისტის, გიორგი გასვიანის ცემის საქმეზე სამცხე-ჯავახეთის სამხარეო პოლიციამ 3 პირი, მიხეილ ხუციშვილი, პაატა კვინიკაძე და ბორის გოგიჩაიშვილი დააკავა. ამის შესახებ თავად გასვიანმა, იბერიას ეთერში განაცხადა. მისივე თქმით, დაკავებულებს ბრალი 48 საათის განმავლობაში წარედგინებათ.

გიორგი გასვიანმა 19 დეკემბერს განაცხადა, რომ სამოქალაქო ფორმაში მყოფმა პოლიციელებმა, რომლებმაც ის მანქანიდან გადმოიყვანეს, სცემეს და თავზე იარაღი მიაბჯინეს, ხოლო როდესაც გაიგეს რომ ჟურნალისტი იყო, პირობა დაადებინეს, რომ ამბავს არ გაასაჯაროებდა.

გამოძიება სსკ-ის 333-ე მუხლის მე-3 ნაწილის ბ ქვეპუნქტით მიმდინარეობდა, რაც გულისხმობს სამსახურებრივი უფლებამოსილების გადამეტებას სახელმწიფო-პოლიტიკური თანამდებობის მქონე პირის მიერ, ძალადობით ან იარაღის გამოყენებით.