ქართული ოცნების ერთ-ერთი ლიდერის, მამუკა მდინარაძის განცხადებით, პრემიერ-მინისტრობის კანდიდატ გიორგი გახარიას მიერ წარდგენილი მინისტრთა კაბინეტის შემადგენლობა პროფესიონალი კადრებით არის დაკომპლექტებული. მდინარაძის თქმით, მათ გუნდის მხარდაჭერა ექნებათ.

"ჩვენ გვყავს პროფესიონალი კადრები. თქვენ იცით, რომ მათ ძალიან მძიმე პერიოდში, რომელიც პანდემიის ფონის გამოა ქვეყანაში, შეძლეს, კრიზისული მენეჯმენტი ეფექტიანად განეხორციელებინათ. ისინი არიან პროფესიონალები და ამიტომ, მათ ჩვენი გუნდის მხარდაჭერა, ბუნებრივია, ექნებათ", — განაცხადა მდინარაძემ.

ის, ასევე, სრული პასუხისმგებლობით ამბობს, რომ იუსტიციის მინისტრის პოსტზე წარდგენილი გოჩა ლორთქიფანიძე პროფესიონალი კადრია. მდინარაძეს სჯერა, რომ ლორთქიფანიძე ძალიან კარგი მინისტრი იქნება.

გახარია მინისტრთა კაბინეტის შემადგენლობას არ ცვლის. მან სია პარლამენტს უკვე გადაუგზავნა, რომლის მიხედვით, იცვლება მხოლოდ იუსტიციის მინისტრი, რადგან თეა წულუკიანი საპარლამენტო არჩევნებამდე გადადგა და საქმიანობას საკანონმდებლო ორგანოში აგრძელებს. თანამდებობას ინარჩუნებს ჯანდაცვის მინისტრი, ეკატერინე ტიკარაძეც.