საქართველოს პრემიერმინისტრობის კანდიდატი, გიორგი გახარია მინისტრთა კაბინეტის შემადგენლობას არ ცვლის. მან სია პარლამენტს უკვე გადაიგზავნა, რომლის მიხედვით, იცვლება მხოლოდ იუსტიციის მინისტრი, რადგან თეა წულუკიანი საპარლამენტო არჩევნებამდე გადადგა და საქმიანობას საკანონმდებლო ორგანოში აგრძელებს. თანამდებობას ინარჩუნებს ჯანდაცვის მინისტრი, ეკატერინე ტიკარაძე.

შესაბამისად, მინისტრები იქნებიან:

• პრემიერმინისტრი — გიორგი გახარია;
• განათლების, მეცნიერების, კულტურისა და სპორტი მინისტრი — მიხეილ ჩხენკელი;
• გარემოს დაცვისა და სოფლის მეურნეობის მინისტრი —- ლევან დავითაშვილი;
• ეკონომიკისა და მდგრადი განვითარების მინისტრი — ნათელა თურნავა;
• თავდაცვის მინისტრი — ირაკლი ღარიბაშვილი;
• იუსტიციის მინისტრი — გოჩა ლორთქიფანიძე;
• ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი — ეკატერინე ტიკარაძე;
• რეგიონული განვითარებისა და ინფრასტრუქტურის მინისტრი —- მაია ცქიტიშვილი;
• საგარეო საქმეთა მინისტრი — დავით ზალკალიანი;
• ფინანსთა მინისტრი — ივანე მაჭავარიანი;
• შინაგან საქმეთა მინისტრი — ვახტანგ გომელაური;
• შერიგებისა და სამოქალაქო თანასწორობის საკითხებში სახელმწიფო მინისტრი — თეა ახვლედიანი.

რაც შეეხება სამთავრობო პროგრამას, მთავრობის ადმინისტრაციაში აცხადებენ, რომ ძირითადი მიზანი იქნება პანდემიით შექმნილი კრიზისის დაძლევა, ეკონომიკის სწრაფი აღდგენა და განვითარება, თითოეული მოქალაქისათვის სტაბილური და უსაფრთხო გარემოს შექმნა, სტრუქტურული რეფორმების გაგრძელება.

"პარალელურად, ქვეყანა გააგრძელებს დემოკრატიის კონსოლიდაციისკენ ნაბიჯების გადადგმას და საგარეო ასპარეზზე ევროპული და ევროატლანტიკური ინტეგრაციისკენ სწრაფვას. შემდგომი წლების ძირითადი ამოცანა იქნება ქვეყნის ინსტიტუციური, ეკონომიკური და სოციალური მომზადება 2024 წელს ევროკავშირის სრულფასოვანი წევრობისთვის განაცხადის გაკეთებისთვის", — აცხადებენ მთავრობის ადმინისტრაციაში.

მათივე ინფორმაციით, მთავრობის ძალისხმევა მიმართული იქნება შემდეგ ოთხ საკვანძო მიმართულებაზე:

• საგარეო პოლიტიკა, უსაფრთხოება, კონფლიქტის მოგვარება და ადამიანის უფლებები;
• ეკონომიკური განვითარება;
• სოციალური პოლიტიკა და ადამიანური კაპიტალის განვითარება;
• სახელმწიფო მმართველობა.

მინისტრობის კანდიდატებს ერთპარტიულ პარლამენტში მომავალ კვირას მოუსმენენ. სწორედ ამის შემდეგ უნდა დაამტკიცოს ქართული ოცნების გუნდმა ქართული ოცნებისვე მინისტრები.