შინაგან საქმეთა სამინისტროს ინფორმაციით, ყაჩაღობისა და განზრახ მკვლელობის ბრალდებით ერთი პირი დააკავეს. უწყების ცნობით, პოლიციამ დანაშაულის ჩადენის იარაღი — სანადირო თოფი ნივთმტკიცების სახით ამოიღო.

"გამოძიებით დადგინდა, რომ ბრალდებულმა მამაკაცმა, მიმდინარე წლის 15 დეკემბერს, ქობულეთის მუნიციპალიტეტში, თანასოფლელ — თ.პ.-ს იარაღის მუქარით ავტომობილი გასტაცა და ქობულეთის მიმართულებით გაემართა. ე.მ.-მ ქობულეთში, მემედ აბაშიძის ქუჩის მიმდებარე ტერიტორიაზე, ნაცნობი — 1968 წელს დაბადებული ვ.ვ., წარსულში არსებული უთანხმოების ნიადაგზე, თანნაქონი სანადირო თოფიდან რამდენიმე გასროლით სასიკვდილოდ დაჭრა და მიიმალა", — აცხადებენ შსს-ში.

სამინისტროში აცხადებენ, რომ ყაჩაღობისა და განზრახ მკვლელობაზე გამოძიება საქართველოს სისხლის სამართლის კოდექსის 179-ე და 108-ე მუხლებით მიმდინარეობს. დანაშაული 6-დან 15 წლამდე ვადით თავისუფლების აღკვეთას ითვალისწინებს.