სტრატეგია აღმაშენებლის ერთ-ერთი ლიდერი, გიორგი ვაშაძე ნაციონალური მოძრაობის წევრებსა და მხარდამჭერებს მოუწოდებს, რომ გრიგოლ ვაშაძის მიმართ აღვირახსნილი თავდასხმები არასწორია.

"გარკვეულ პოსტებს წავაწყდი, სადაც რაღაც აღვირახსნილი თავდასხმაა გრიგოლ ვაშაძეზე ნაციონალური მოძრაობის რიგითი წევრების მხრიდან. მე მათ ვიცნობ ბევრს და მოვუწოდებ, რომ არასწორია ასეთი ტიპის განცხადებები ადამიანთან მიმართებაში, რომელიც ამ წლების მანძილზე ხელმძღვანელობდა ნაციონალურ მოძრაობას, იყო საპრეზიდენტო კანდიდატი და აქტიურად მუშაობდა იმისთვის, რომ ბევრისთვის მიეღწია, ამიტომ მე მათ მოვუწოდებ, რომ ეს რაღაცა ზღვარგადასული თავდასხმებისგან თავი შეიკავონ", — განაცხადა ვაშაძემ ფორმულას ეთერში.

ნაციონალური მოძრაობის თავმჯდომარემ, გრიგოლ ვაშაძემ პარტია დატოვა. ამის შესახებ მან Facebook-ზე დაწერა. ვაშაძემ ნაწილობრივ ისაუბრა წასვლის მიზეზებზეც. მან აღნიშნა რომ, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას. მისთვის კიდევ უფრო მიუღებელია პარტიული სტრატეგიის არარსებობა. ეს მხოლოდ ე.წ. ქართულ ოცნებას აძლევს ხელს. მისივე თქმით, ვერ შეეგუება იმას, რომ პარტიის გარშემო და მის შიგნითაც გამოჩნდნენ ისეთი ოდიოზური ფიგურები, რომლებიც კარგა ხანია თითქოს და ჩააბარეს წარსულს, და რომლებთან ერთად ვერასდროს, იმეგობრებს, მანვე აღნიშნა ,რომ ასე ვერასდროს ვერ მოიპოვებენ ამომრჩევლის ნდობას.