დონალდ ტრამპი 25 იანვარს აშშ–ს საშინაო უსაფრთხოების დეპარტამენტს ეწვია, სადაც ხელი მოაწერა ორ მნიშვნელოვან ბრძანებას. მართალია, თეთრ სახლს არ გაუვრცელებია დეტალური ინფორმაცია ხელმოწერილი ბრძანებების შესახებ, თუმცა ზოგადი დეტალები გაასაჯაროვეს.

თეთრი სახლის პრესსპიკერის, შონ სპაისერის თქმით, ერთი ბრძანება ეხება აშშ–ს ტერიტორიაზე შიდა უსაფრხთოების გაძლიერებას, ხოლო მეორე – საზღვრის დაცვას.

„ეს ეხება საზღვრის უსაფრთხოებას, ჩვენ ამის შესახებ თავიდანვე ვსაუბრობდით“, – თქვა შონ სპაისერმა. მისივე თქმით, ახალი ბრძანება ითვალისწინებს ფიზიკური ბარიერის აგებას აშშ–სა და მექსიკას შორის, ასევე, არალეგალებთან ბრძოლას, რაც გულისხმობს მათ დაუყონებლივ დეპორტაციას და იმ საზღვრისპირა ქალაქების „დასჯას“, რომლებიც მათ მფარველობას უწევენ.

თეთრის სახლის პრესმდივანს ჯერჯერობით არ დაუკონკრეტებია, თუ რა დაჯდება, ან კონკრეტულად როდის დაიწყება კედლის მშენებლობა, თუმცა მან თქვა, რომ თავდაპირველად თანხები საშინაო უსაფრთხოების დეპარტამენტის ბიუჯეტიდან დაიხარჯება.

მექსიკასთან კედლის აშენება და არალეგალურ იმიგრაციასთან ბრძოლა დონალდ ტრამპის ერთ–ერთი მთავარი წინასაარჩევნო დაპირება იყო.