ევროკავშირის ელჩი საქართველოში, კარლ ჰარცელი აცხადებს, რომ იმედოვნებს, წლის ბოლომდე საქართველო დახმარების კიდევ ერთ დიდ პარტიას მიიღებს.

"უშუალოდ პანდემიასთან ბრძოლაში ჩვენ ვთანამშრომლობთ ჯანდაცვის მსოფლიო ორგანიზაციასთან. ერთად, ჩვენ უკვე გადავეცით საქართველოს სამედიცინო აღჭურვილობის დაახლოებით 2 მილიონი ერთეული, მათ შორის ინდივიდუალური დაცვის საშუალებები, სამედიცინო პირბადეები, სპეციალური ტანსაცმელი და სხვა. აგრეთვე, ისეთი სამედიცინო მოწყობილობები, როგორიცაა სასუნთქი აპარატები. ჩვენ იმედი გვაქვს, რომ წლის ბოლომდე საქართველო დახმარების კიდევ ერთ დიდ პარტიას მიიღებს, რასაც მე მოუთმენლად ველი", — განაცხადა ჰარცელმა.

ჰარცელის თქმით, მათი დახმარება საქართველოს 9 ლაბორატორიაზე, საგანგებო სიტუაციების კოორდინაციისა და გადაუდებელი დახმარების ცენტრებზე, 4 000-ზე მეტ სასწრაფო სამედიცინო დახმარების ბრიგადის მძღოლსა და ექიმზე ნაწილდება.

ევროკავშირის ელჩის განცხადებით, ევროკავშირის მიერ საქართველოსთვის უკვე გამოყოფილი თანხა ძირითადად ოთხ სფეროს მოხმარდება. მისი თქმით, თანხის ნახევარზე მეტი ნაწილი Covid-19-ის წინააღმდეგ შემუშავებულ ანტიკრიზისული ეკონომიკური გეგმის განხორციელებასა და მთავრობის სათანადოდ ფუნქციონირების ფინანსურ უზრუნველყოფას მოხმარდება.

ელჩის თქმით, მეორე სფერო ჯანდაცვის სისტემის გაძლიერებას მოიცავს.

"ხდება სამედიცინო აღჭურვილობის უზრუნველყოფა, როგორიცაა სასუნთქი აპარატები, სამედიცინო პირბადეები და სამედიცინო პერსონალის გადამზადება", — აცხადებს ის.

მისივე თქმითმ განსაკუთრებული ყურადღება ეთმობა მოწყვლად ჯგუფებს, როგორიცაა შეზღუდული შესაძლებლობის მქონე პირები, იძულებით გადაადგილებული პირები, ოჯახში ძალადობის მსვერპლები, რომლებიც კრიზისის პერიოდში განსაკუთრებულად დაზარალდნენ. ელჩის თქმით, ამ სფეროში სამოქალაქო საზოგადოების ორგანიზაციებს აძლიერებენ, რომლებიც ამ ჯგუფებს პირდაპირ მხარდაჭერას უწევენ.

ევროკავშირის ელჩის განცხადებით, ეკონომიკური მდგრადობისა და ეკონომიკის აღდგენის მხარდაჭრაზე განსაკუთრებული ძალისხმევაა მიმართული.