ამაზონმა საზოგადოებას ახალი სერვისი წარუდგინა. STEM კლუბის გამოწერის სერვისი თვეში $19.99 ღირს და ამ ფასად ამაზონი თქვენს ბავშვებს საგანმანათლებლო სათამაშოებს გამოუგზავნის. STEM აბრევიატურაა და იშიფრება, როგორც მეცნიერება, ტექნოლოგია, ინჟინერია და მათემატიკა. სათამაშოებიც სწორედ ამ სფეროებთან იქნება დაკავშირებული.

გამოწერის სერვისი სამ ასაკობრივ კატეგორიაზეა გათვლილი: 3-4 წლის ბავშვებისთვის, 5-7 წლის ბავშვებისთვის და 8-13 წლის მოზარდებისთვის. მას შემდეგ, რაც STEM კლუბის გამომწერი გახდებით, ამაზონი საკუთარი ექსკლუზიური პროდუქტებიდან ბავშვის ასაკის გათვალისწინებით შეარჩევს სათამაშოებს და ყოველთვიურად მოიტანს თქვენს მისამართზე.

ონლაინ-მაღაზია საგანმანათლებლო სათამაშოებს 2015 წლიდან უწევს პოპულარიზაციას და მათ სურათებს ხშირად ათავსებს პირველ გვერდზე. გამოწერის სერვისი ამ კუთხით წინ გადადგმული ნაბიჯია და მშობლებისთვის საქმის გაადვილებას ემსახურება. ხშირად მშობლებმა არ იციან, რომელი სათამაშოები დაეხმარება მათ შვილებს ლოგიკური აზროვნებისა და წარმოსახვის განვითარებაში და არჩევანს სტანდარტულ პროდუქტებზე აკეთებენ. STEM კლუბის გამოწერის სერვისის დახმარებით ბავშვები ისეთ სათამაშოებს აღმოაჩენენ, რომლებიც მანამდე უზარმაზარ სივრცეში იკარგებოდა.

STEM-ის სათამაშოების გამოწერა ქართველ მშობლებსაც შეუძლიათ, თუ მათ საკუთარი მისამართი აქვთ ამერიკის შეერთებულ შტატებში.