შინაგან საქმეთა სამინისტროს ინფორმაციით, კარანტინისა და იზოლაციის წესების, ასევე, პირბადის ტარების წესის დარღვევის გამო, 721 პირი დააჯარიმეს.

უწყების ცნობით, დაჯარიმებულთა შორის იზოლაციისა და კარანტინის წესის დარღვევის გამო 56 ფიზიკური პირი დააჯარიმეს, ხოლო პირბადის ტარების წესის დარღვევის გამო — 665 პირი.

შსს-ს ინფორმაციით, პირბადის ტარების წესის დარღვევა იწვევს ადმინისტრაციულ პასუხისმგებლობას და ასკ-ის 42(11)-ე მუხლის შესაბამისად ჯარიმას 20 ლარის ოდენობით. იზოლაციისა და კარანტინის წესის დარღვევა კი იწვევს ადმინისტრაციულ პასუხისმგებლობას და ასკ–ის 42(10)-ე მუხლის შესაბამისად ფიზიკური პირის დაჯარიმებას 2 000 ლარით, ხოლო იურიდიული პირის — 10 000 ლარის ოდენობით.

განმეორებითი ჯარიმა სისხლის სამართლებრივ პასუხისმგებლობას ითვალისწინებს.