ევროპული საქართველოს ერთ-ერთი ლიდერის, გიგი უგულავას თქმით, ქართული ოცნება თავისი გაყალბებული არჩევნებისთვის, იგონებს თავისივე კომისიას. როგორც იგი ამბობს, მათივე ლოგიკაა "სამ ტანცუეტ, სამ პაიოტია" [თვითონ ცეკვავს, თვითონ მღერის].

"თვითონ გააყალბეს არჩევნები და ახლა თვითონვე ქმნიან კომისიას, რომ თავისი გაყალბებული თვითონვე შეისწავლონ. ეს არის ქართული ოცნების ლოგიკა "სამ ტანცუეტ, სამ პაიოტ", ამიტომ ამ კომისიისგან არაფერი გამოვა. ეს კომისია იქნება მხოლოდ და მხოლოდ საკუთარი თავის უბადრუკი გაპრავების მცდელობა", — განაცხადა უგულავამ.

ქართული ოცნების აღმასრულებელმა მდივანმა, ირაკლი კობახიძემ მმართველ პარტიის ოფისში გამართულ ბრიფინგზე განაცხადა, რომ ახალი მოწვევის პარლამენტში დაინიცირდება კანონპროექტი, რომლის საფუძველზეც საარჩევნო რეგისტრაცია გაუუქმდება იმ პოლიტიკურ პარტიას, რომლის ლიდერიც კონსტიტუციურ ცენზს არ აკმაყოფილებს.

მისი თქმით, საქართველოში პოლარიზაციის მთავარი წყარო მიხეილ სააკაშვილია, რომელიც არ აკმაყოფილებს ორ კონსტიტუციურ ცენზს — არ არის საქართველოს მოქალაქე და შეფარდებული აქვს თავისუფლების აღკვეთა, რაც აღსრულებას ექვემდებარება.